సుక్కూ వల్ల స్టార్ అయ్యా.. టెర్రస్ పై అదే మాట్లాడాం: బన్నీ

టాలీవుడ్ ఐకాన్ స్టార్ అల్లు అర్జున్.. పుష్ప-2 మూవీతో సందడి చేసేందుకు సిద్ధమవుతున్నారు. లెక్కల మాస్టర్ సుకుమార్ దర్శకత్వం వహిస్తున్న ఆ సినిమా.. డిసెంబర్ 5వ తేదీన రిలీజ్ కానుంది. ప్రమోషన్స్ లో భాగంగా మేకర్స్ తాజాగా ముంబైలో ప్రెస్ మీట్ ఏర్పాటు చేయగా.. బన్నీ సుకుమార్ తో తన అనుబంధాన్ని పంచుకున్నారు.

దర్శకుడు సుకుమార్‌ తో తనది 20 ఏళ్ల ప్రయాణమని తెలిపారు అల్లు అర్జున్. తన రెండో సినిమా అయిన ఆర్యకు ఆయనే డైరెక్టర్ అని గుర్తు చేశారు. తాను ఈ రోజు స్టేజీపై అందరి ముందు నిలబడ్డాను అంటే సుకుమారే కారణమని చెప్పారు. ఆయన వల్లే స్టార్‌ అయ్యా అనడంలో ఎలాంటి అతిశయోక్తి లేదని అన్నారు అల్లు అర్జున్.

తన జీవితంలో సుకుమార్ చాలా మార్పు తీసుకొచ్చారని తాను ఎప్పుడూ చెప్పుకుంటానని బన్నీ తెలిపారు. ఇప్పుడు ఈ ఈవెంట్ లో సుకుమార్ ను మిస్ అవుతున్నట్లు చెప్పారు. ఆయనను అద్భుతమైన డైరెక్టర్ గా కొనియాడారు. ఆయన ఇక్కడే లేరంటే దాని బట్టి డెడికేషన్ ఏంటో అర్థమవుతోందని సుక్కును ప్రశంసించారు.

ప్రస్తుతం సుకుమార్ సినిమా పనులతో బిజీగా ఉన్నారని అల్లు అర్జున్ తెలిపారు. ఇంకా బెటర్ గా అవుట్ పుట్ ఇచ్చేందుకు ట్రై చేస్తున్నారని చెప్పారు. తాము సినిమా ఎంత కలెక్షన్లు సాధిస్తుందని, ఎంత ఖర్చు పెడుతున్నామన్న విషయం గురించి ఎప్పుడూ ఆలోచించలేదని వెల్లడించారు. పుష్ప కోసం టీమ్ అంతా ఐదేళ్ల వెచ్చించామన్నారు.

అందులో పుష్ప 2కే మూడేళ్లు పట్టిందని తెలిపారు. తమను నమ్మండని.. సీక్వెల్ మూవీ కూడా అందరికీ నచ్చుతుందనే నమ్మకం ఉందని అన్నారు. కచ్చితంగా మీ హార్ట్స్ ను టచ్ చేస్తుందని తెలిపారు. ఆ తర్వాత సుకుమార్ తో తన ఆఫీస్ టెర్రస్ పై దిగిన పిక్ కోసం మాట్లాడారు అల్లు అర్జున్. అది ఎప్పుడు తీసుకున్నారో చెప్పారు.

అప్పుడు తాను పాత బిల్డింగ్ ను కూల్చి కొత్త ఆఫీస్ ను నిర్మిస్తున్నామని తెలిపారు. అందులో ఫస్ట్ పుష్ప మీటింగ్ ను సుకుమార్ తో నిర్వహించానని చెప్పారు. అప్పుడు ఆఫీస్ ఇంకా పూర్తిగా నిర్మించలేదని.. టెర్రస్ పై ఛాయ్ తాగి మాట్లాడుకున్నట్లు గుర్తు చేసుకున్నారు. 2020లో దిగిన పిక్ అని, అదొక మెమరీ అని తెలిపారు.