పుష్ప-2కు బన్నీ చిన్న బ్రేక్.. దేనికంటే..

టాలీవుడ్ ఐకాన్ స్టార్ అల్లు అర్జున్.. ప్రస్తుతం ప్రెస్టీజియస్ ప్రాజెక్ట్ పుష్ప-2 చేస్తున్న విషయం తెలిసిందే. లెక్కల మాస్టర్ సుకుమార్ దర్శకత్వం వహిస్తున్న ఆ సినిమా షూటింగ్ ఇప్పుడు చివరి దశకు చేరుకుంది. మరికొద్ది రోజుల్లో మేకర్స్ గుమ్మడికాయ కొట్టేందుకు సిద్ధమవుతున్నారు. కంప్లీట్ యాక్షన్ ఎంటర్టైనర్ గా రూపొందుతున్న పుష్ప సీక్వెల్ కోసం బన్నీ ఫ్యాన్స్, సినీ ప్రియులు ఎంతో వెయిట్ చేస్తున్నారు.

అయితే అల్లు అర్జున్.. పుష్ప-2 షూటింగ్ నుంచి ఒక్క రోజు బ్రేక్ తీసుకున్నట్లు ఇప్పుడు వార్తలు వస్తున్నాయి. మరో ప్రాజెక్ట్ కోసం బన్నీ.. పుష్ప-2ను ఒక్కరోజు పక్కన పెట్టారట. అది ఏ ప్రాజెక్టోనని ఆలోచిస్తున్నారా.. బన్నీ పుష్ప-2 నుంచి బ్రేక్ తీసుకున్నది సినిమా కోసం కాదు.. యాడ్ కోసం. ఇప్పటికే రెడ్ బాస్ యాడ్ లో నటించిన అల్లు అర్జున్.. థమ్స్ అప్ యాడ్ లో కనిపించనున్నారని ఎప్పటి నుంచో వార్తలు వస్తున్నాయి.

ఇప్పుడు ఆ షూటింగే జరిగినట్లు తెలుస్తోంది. ఆ యాడ్ ను దర్శకుడు వివేక్ ఆత్రేయ డైరెక్ట్ చేశారని వార్తలు వినిపిస్తున్నాయి. అవుట్ పుట్ చాలా బాగా వచ్చినట్లు టాక్ వస్తోంది. దీంతో ఫ్యాన్స్ ఫుల్ ఖుషీ అవుతున్నారు. వెయిటింగ్ ఫర్ యాడ్ అంటూ కామెంట్లు పెడుతున్నారు. పుష్ప-2 సినిమా రిలీజ్ అయిన రోజే యాడ్ ను సర్ప్రైజ్ గా రివీల్ చేయనున్నట్లు తెలుస్తోంది. డిసెంబర్ 5వ తేదీన నేరుగా థియేటర్లలో ప్లే చేయనున్నారని సమాచారం.

అయితే ఇప్పటికే టాలీవుడ్ మెగాస్టార్ చిరంజీవి, సూపర్ స్టార్ మహేష్ బాబు, రౌడీ హీరో విజయ్ దేవరకొండ వంటి పలువురు స్టార్లు థమ్స్ అప్ యాడ్ లో కనిపించారు. ప్రేక్షకులను మెప్పించి సందడి చేశారు. ఇప్పుడు ఐకాన్ స్టార్.. అదే యాడ్ లో మెరవనున్నారు. దీంతో బన్నీ ఎలాంటి స్టంట్స్ చేసి ఉంటారోనని నెటిజన్లు, అభిమానులు డిస్కస్ చేసుకుంటున్నారు. అల్లు అర్జున్ కచ్చితంగా అదరగొట్టేస్తారని చెబుతున్నారు.

అదే సమయంలో మరో టాక్ కూడా వినిపిస్తోంది. ప్రస్తుతం పుష్ప పేరు ఎత్తగానే.. అందరికీ తగ్గేదేలే డైలాగ్ కచ్చితంగా గుర్తుకు వస్తుంది. దీంతో థమ్స్ అప్ యాడ్ లో ఆ డైలాగ్ ఉంటుందేమోనని కొందరు అంటున్నారు. ఇంకొందరు మాత్రం.. బన్నీ కొత్తగా స్టంట్ చేసి మెప్పిస్తారని చెబుతున్నారు. మరి పుష్ప సీక్వెల్ విడుదల రోజు.. రిలీజ్ అయ్యే థమ్స్ అప్ కొత్త యాడ్ ఎలా ఉంటుందో తెలియాలంటే వేచి చూడాల్సిందే.