ఐకాన్ స్టార్ కే ఛాలెంజ్ విసిరిన గెట‌ప్ అది!

జాత‌ర సాంగ్ లో ఐకాన్ స్టార్ అల్లు అర్జున్ లేడీ గెట‌ప్ ఎంత హైలైట్ అయిందో చెప్పాల్సిన ప‌నిలేదు. ఆ లుక్ కి సంబంధించి పోస్ట‌ర్ రిలీజ్ అవ్వ‌గానే? సినిమాపై హైప్ అంత‌కంత‌కు పెరిగిపోయింది. అటుపై జాత‌ర సాంగ్ ఎలివేష‌న్ తో? అంచ‌నాలు పీక్స్ కి చేరాయి. పుష్ప పాత్ర‌తో పాటు, సుకుమార్ స‌రికొత్త బ‌న్నీనే వెండి తెర‌పై ఆవిష్క‌రిస్తున్నాడని క్లారిటీ వ‌చ్చేసింది. బ‌న్నీ లుక్ చూసి సాధార‌ణ అభిమానే కాదు చిత్ర ప‌రిశ్ర‌మే షాక్ అయింది.

ఇలాంటి ఓ గెట‌ప్ ఒక‌టి ఉంటుంద‌ని ఎవ్వ‌రూ ఊహించ‌లేదు. సుకుమార్ లో మాస్ కోణానికి ప‌రాకాష్ట‌గా హైలైట్ అయింది. తాజాగా ఆ లేడీ గెట‌ప్ గురించి బ‌న్నీ కొన్ని ఆస‌క్తిక‌ర విష‌యాలు పంచుకున్నారు. `పుష్ప2 లో ప్రతి సీన్ ను నేను ఇష్టపడి చేసాను. కానీ లేడీ గెటప్ రోల్ చేసిన సమయంలో మాత్రం ఎంత ఇష్టపడ్డానో అంతే స్థాయిలో కష్టపడ్డాను. అది చాలా పెయిన్ తో కూడుకుంది. ఆ పాత్ర మేకప్ కోసమే రెండున్నర గంటల టైమ్ పట్టేది.

చూడటానికి చాలా సులువుగా అనిపిస్తుంది కానీ అది నాకు పెద్ద‌ ఛాలెంజ్. ఇప్పటి వరకు నేను చేసిన సీన్స్ లో క‌ష్ట‌మైన సీన్స్ ఏవైనా? ఉన్నాయి అంటే అవి ఈ లేడీ గెటప్ స‌న్నివేశాలే. ఆ గెటప్ మానసికంగా ,శారీరకంగా కూడా ఇబ్బంది పెట్టింది. ఒక దశలో వెన్నునొప్పి వచ్చేసింది. దీంతో మధ్యలో షూట్ కూడా ఆపేయాల్సి వచ్చింది. కూర్చుంటే పెయిన్ గా ఉండేది. దీంతో ఆ నొప్పి పూర్తిగా త‌గ్గే వ‌ర‌కూ ఆ స‌న్నివేశాలు చేయ‌లేదు` అని అన్నారు.

ఇక ఈ సినిమా బ‌న్నీ కెరీర్ లో భారీ బిజినెస్ చేసిన చిత్రంగా నిలిచింది. ఈ విష‌యాన్ని బ‌న్నీ కూడా ధృవీక‌రించాడు. లెక్క ఇంత అని చెప్ప‌లేదు గానీ భారీ మొత్తంలో చేసిన‌ట్లు చెప్పుకొచ్చారు. ఇక రిలీజ్ త‌ర్వాత కలెక్షన్ల విషయంలో దుమ్ము దులిపేస్తుంద‌ని అభిమానులు భావిస్తున్నారు. బాలీవుడ్ స‌హా టాలీవుడ్ లోనూ స‌రికొత్త రికార్డులు రాస్తుంద‌ని అంటున్నారు.