నేషనల్ అవార్డుపై బన్నీ.. అప్పుడు అలా, ఇప్పుడు ఇలా!

నేషనల్ ఫిలిం అవార్డ్ అందుకున్న మొట్టమొదటి తెలుగు హీరోగా ఐకాన్ స్టార్ అల్లు అర్జున్ నిలిచారు. 'పుష్ప: ది రైజ్' సినిమాలో అసాధారణమైన నటనకు గాను, బెస్ట్ యాక్టర్ క్యాటగిరీలో జాతీయ పురష్కారాన్ని గెలుచుకొని చరిత్ర సృష్టించారు. తెలుగు సినిమాలు పాన్ ఇండియా వైడ్ గా సత్తా చాటుతున్న తరుణంలో, బన్నీకి ఇలాంటి ప్రతిష్టాత్మక అవార్డు రావడంపై సర్వత్రా ప్రశంసలు దక్కాయి. అయితే ఈ అవార్డ్ సాధించడంపై అల్లు అర్జున్ అప్పుడు ఒకలా, ఇప్పుడు ఇంకోలా మాట్లాడటం సోషల్ మీడియాలో వైరల్ అవుతోంది.

ఆహా ఓటీటీలో నందమూరి బాలకృష్ణ హోస్ట్ చేస్తున్న 'అన్ స్టాపబుల్' సీజన్ 4లో అల్లు అర్జున్ ముఖ్య అథితిగా పాల్గొన్నారు. త్వరలోనే ఈ ఎపిసోడ్ ను రెండు పార్టులుగా స్ట్రీమింగ్ చేయనున్నారు. తాజాగా దీనికి సంబంధించిన ప్రోమోని టీం రిలీజ్ చేసింది. ఇందులో 'నేషనల్ అవార్డు వచ్చినప్పుడు ఎలా అనిపించింది?' అని బాలయ్య అడగ్గా.. ''బెస్ట్ యాక్టర్ క్యాటగిరీ కింద నేషనల్ అవార్డు ఎవరికి వచ్చింది అని చెక్ చేస్తే, ఒక్క తెలుగు యాక్టర్ పేరు కూడా కనిపించలేదు. అది నా మనసులో బాగా ఉండిపోయింది. అందుకే దాన్ని రౌండప్ చేసి దీన్ని కొట్టాలి అని ఫిక్స్ అయ్యాను'' అని బన్నీ చెప్పారు.

'అన్ స్టాపబుల్' షోలో నేషనల్ అవార్డు గురించి అల్లు అర్జున్ చేసిన వ్యాఖ్యలపై నెట్టింట ట్రోలింగ్ జరుగుతోంది. ఎందుకంటే అవార్డు వచ్చినప్పుడు బన్నీ వేరే విధంగా స్పందించారు. తెలుగు యాక్టర్స్ లో మొదటి అవార్డు తనకే వచ్చిందని తెలిసినప్పుడు ఆనందం కలిగినా, అంతకంటే ఎక్కువ షాక్ తిన్నానని తెలిపారు. ''నేను ఏ మూడోవాడినో, నాలుగో వాడినో అవుతాను అనుకున్నాను. అందుకే ఒకసారి చెక్ చేయమని చెప్పాను. కానీ న్యూస్ ఛానల్స్ అన్నీ నేనే ఫస్ట్ అని వేసిన తర్వాత ఆశ్చర్యపోయాను. నేనేదో గొప్ప నటడిని అని కాదు, నా కంటే గొప్ప గొప్ప నటులు ఉన్నారు. కానీ వారికి ఆ సమయంలో ఎందుకో కుదరలేదు'' అని అల్లు అర్జున్ అప్పట్లో ఓ ఇంటర్వ్యూలో అన్నారు.

జాతీయ అవార్డు వచ్చినప్పుడు తెలుగులో తొలి పురష్కార గ్రహీత తనే అని తెలిసి షాక్ అయ్యానని చెప్పిన అల్లు అర్జున్.. ఇప్పుడు బాలయ్య టాక్ షోలో మాత్రం తనే టార్గెట్ పెట్టుకొని బెస్ట్ యాక్టర్ అవార్డు సాధించినట్లుగా చెబుతున్నాడని యాంటీ ఫ్యాన్స్ సోషల్ మీడియాలో ట్రోల్ చేస్తున్నారు. మాట మార్చడంలో బన్నీ తర్వాతే అంటూ నెగెటివ్ కామెంట్స్ చేస్తున్నారు. ఈ వీడియోలు నెట్టింట వైరల్ అవుతున్నాయి.

ఇదంటుంచితే, 'పుష్ప' చిత్రంలో పుష్పరాజ్ గా అల్లు అర్జున్ అద్భుతమైన నటన కనబరిచారని చెప్పాలి. ఆయన యాక్షన్-ప్యాక్డ్ పెర్ఫార్మన్స్ కి యావత్ సినీ అభిమానులు మంత్రముగ్ధులయ్యారు. ఆయన నటనకు విమర్శకుల ప్రశంసలు దక్కాయి. ఈ చిత్రానికి సీక్వెల్ గా సుకుమార్ దర్శకత్వంలో 'పుష్ప: ది రూల్' మూవీ తెరకెక్కుతోంది. డిసెంబర్ 5వ తేదీన ప్రపంచ వ్యాప్తంగా ప్రేక్షకుల ముందుకు రానుంది. ఈ నేపథ్యంలో ఈ నెల 17వ తేదీ నుంచి గ్రాండ్ గా మూవీ ప్రమోషన్స్ చేయడానికి ప్లాన్ చేస్తున్నారు. ముందుగా ట్రైలర్ లాంచ్ ఈవెంట్ ను నిర్వహించబోతున్నారు.