'పుష్ప 2'లో బన్నీ కొత్త మ్యానరిజం ఇదే!

ఐకాన్ స్టార్ అల్లు అర్జున్, నేషనల్ క్రష్ రష్మిక మందన్న జంటగా నటిస్తున్న చిత్రం ''పుష్ప 2: ది రూల్''. సుకుమార్ బండ్రెడ్డి దర్శకత్వంలో తెరకెక్కుతున్న ఈ సినిమా డిసెంబర్ 5న ప్రేక్షకుల ముందుకు రానుంది. ఈ నేపథ్యంలో ఇటీవలే మేకర్స్ రిలీజ్ చేసిన ట్రైలర్ కు అనూహ్యమైన స్పందన లభిస్తోంది. సోషల్ మీడియాలో సరికొత్త రికార్డులు క్రియేట్ చేయడమే పనిగా పెట్టుకున్న ఈ ట్రయిలర్.. యూట్యూబ్ లో 120 మిలియన్లకు పైగా వ్యూస్ తో ట్రెండింగ్ లో కొనసాగుతోంది. ఇక ఈ ట్రైలర్ లో కొన్ని ఇంట్రెస్టింగ్ ఎలిమెంట్స్‌ని నెటిజన్లు డీకోడ్ చేయడానికి ప్రయత్నిస్తున్నారు.

'పుష్ప 2' ట్రైలర్ ని మనం బాగా గమనించినట్లయితే.. ఈ సినిమాలో అల్లు అర్జున్ కొత్త మ్యానరిజాన్ని చూపించబోతున్నట్లు తెలుస్తోంది. 'పుష్ప: ది రైజ్'లో బన్నీ తన ఎడమ చేతి భుజాన్ని కాస్త పైకి లేపి, యాటిట్యూడ్ చూపిస్తూ ఒక స్వాగ్ తో నడుస్తుంటారు. తగ్గేదేలే అంటూ తన గడ్డాన్ని సవరించుకుంటూ కనిపిస్తారు. అయితే ఇప్పుడు సెకండ్ పార్ట్ లో దానికి మరింత స్వాగ్ ని జోడిస్తున్నారు సుక్కూ. పుష్పరాజ్ తన కుడి చేతిని కొంచెం పైకి ఎత్తి, చేతికున్న వాచ్ ని టైట్ చేసుకుంటున్నట్లుగా హ్యాండ్ ని షేక్ చేయడాన్ని మేనరిజంగా పెట్టినట్లు అర్థమవుతోంది.

'పుష్ప 2: ది రూల్' ట్రైలర్ లో కొత్త మ్యానరిజంతో అల్లు అర్జున్ నాలుగైదు షాట్స్ కనిపించాయి. సినిమాలో ఇది కచ్చితంగా అభిమానులను ఆకట్టుకుంటుందని అనిపిస్తోంది. ఇప్పటికే దీనికి సంబంధించిన స్క్రీన్ షాట్స్ సోషల్ మీడియాలో వైరల్‌గా మారాయి. ఇక పుష్పరాజ్ తగ్గదేలే డైలాగ్ ని అస్సలు తగ్గేదేలేగా చెప్పబోతున్నట్లు తెలుస్తోంది. ట్రైలర్ లో రష్మిక మందన్న కాలితో తన ఐకానిక్ తగ్గేదేలే మ్యానరిజం చూపించే సీన్ హైలైట్ గా నిలిచింది. ఇది పుష్పరాజ్ ను పర్ఫెక్ట్ హస్బెండ్ మెటీరియల్ గా ప్రెజెంట్ చేస్తుంది. పెళ్లాం మాట మొగుడు వింటే ఎలా వుంటాడో ఈ ప్రపంచానికి చూపిస్తా అనే డైలాగ్ పుష్పకు తన భార్య శ్రీవల్ల పట్ల ఎంత ప్రేమ ఉందనేది తెలియజేస్తుంది.

మొత్తం మీద అంచనాలకు ఏమాత్రం తగ్గకుండా, ఫస్ట్ పార్ట్ కి మించి ఉండేలా భారీ కాన్వాస్ లో 'పుష్ప: ది రూల్' సినిమాని రూపొందిస్తున్నట్లు ట్రైలర్ తోనే క్లారిటీ వచ్చేసింది. మొదటి భాగంలో కూలీగా జీవితాన్ని ప్రారంభించిన పుష్పరాజ్.. ఎర్రచందనం స్మగ్లింగ్ సిండికేట్ ను శాసించే స్థాయికి ఎలా ఎదిగాడనేది చూపించారు. ఇప్పుడు పార్ట్-2లో నేర సామ్రాజ్యాన్ని ఎలా రూల్ చేయబోతున్నాడు? శత్రువులను ఎదుర్కొని ఇంటర్నేషనల్ లెవెల్ కి ఎలా వెళ్ళాడు? అనేది థ్రిల్లింగ్ గా చూపించబోతున్నారు సుకుమార్. ఈసారి కథలోకి సరికొత్త పాత్రలు, భారీ యాక్షన్, ఎమోషన్స్, ట్విస్ట్ అండ్ టర్న్స్ ఉండబోతున్నాయని తెలుస్తోంది.

మైత్రీ మూవీ మేకర్స్, సుకుమార్ రైటింగ్స్ బ్యానర్స్ లో రూపొందుతున్న 'పుష్ప 2' చిత్రంలో ఫహాద్ ఫాజిల్, సునీల్, జగపతిబాబు, అనసూయ భరద్వాజ్, తారక్ పొన్నప్ప, జగదీశ్, డాలీ ధనుంజయ, సౌరభ్ సచ్‌దేవా కీలక పాత్రలు పోషిస్తున్నారు. శ్రీలీల ఐటెం సాంగ్ లో కనిపించనుంది. దేవిశ్రీ ప్రసాద్ మ్యూజిక్ అందిస్తున్న ఈ చిత్రానికి మిరోస్లా కుబా బ్రోజెక్ సినిమాటోగ్రఫీ నిర్వహించారు. తెలుగు తమిళ హిందీ కన్నడ మలయాళ భాషల్లో అత్యధిక స్క్రీన్స్ లో ఈ మూవీ రిలీజ్ కానుంది. ఇప్పటికే అడ్వాన్స్ బుకింగ్స్ లో సంచలనం సృష్టిస్తోంది. యూఎస్ఏ ప్రీ సేల్స్ లో ఫాస్ట్ గా 1 మిలియన్ డాలర్ల మార్క్ ను క్రాస్ చేసిన ఇండియన్ మూవీగా నిలిచింది.