వైసీపీ లీడర్ కోసం రంగంలోకి బన్నీ.. బిగ్ ట్విస్ట్

తెలుగు రాష్ట్రాల్లో ఎన్నికల ప్రచార పర్వం మరికొద్ది గంటల్లో ముగుస్తుండటంతో.. అన్ని రాజకీయ పార్టీల నేతలు విస్తృతంగా క్యాంపెయినింగ్ చేస్తున్నారు. తమ అభ్యర్థులను గెలిపించాలని పార్టీల అధినేతలు ప్రజలను కోరుతున్నారు. ప్రతి ఒక్క అభ్యర్థి ఓటర్లను తమ వైపు తిప్పుకునేందుకు ఇప్పటికే అనేక వరాలను కురిపించారు. అయితే ఈసారి ఎన్నికల్లో.. ముఖ్యంగా ఆంధ్రప్రదేశ్ లో సినీ గ్లామర్ కాస్త ఎక్కువగా కనిపిస్తోంది.

రాజకీయ నాయకులకు మద్దతుగా అనేక మంది సినీ ప్రముఖులు రంగంలోకి దిగారు. జనసేన పార్టీ అధినేత పవన్ కళ్యాణ్‌ కు మద్దతుగా మెగా ఫ్యామిలీకి చెందిన చాలా మంది హీరోలు, నటులు ఆయన పోటీ చేస్తున్న పిఠాపురం నియోజకవర్గంలో ఎన్నికల ప్రచారం నిర్వహించారు. మెగాస్టార్ చిరంజీవి కూడా తన తమ్ముడు పవన్ ను భారీ మెజార్టీతో గెలిపించాలని సోషల్ మీడియాలో స్పెషల్ వీడియో రిలీజ్ చేసిన విషయం తెలిసిందే.

మరోవైపు, స్టార్ హీరో అల్లు అర్జున్ కూడా సోషల్ మీడియా వేదికగా పవన్ కళ్యాణ్ కు మద్దతు తెలిపారు. ఒక కుటుంబ సభ్యుడిగా పవన్ కు ఎప్పుడూ తన మద్దతు ఉంటుందని ట్వీట్ చేశారు. ఆయన ఆకాంక్షలు, లక్ష్యాలు నెరవేరాలని కోరుకుంటున్నట్లు బన్నీ తెలిపారు. దీంతో అల్లు అర్జున్ అభిమానులు కూడా పవన్ కళ్యాణ్ కు మద్దతు తెలుపుతూ సోషల్ మీడియాలో పోస్టులు పెట్టారు. ఇప్పుడు బన్నీ ఏపీలోని నంద్యాలకు వెళ్లనున్నారు.

వైసీపీ ఎమ్మెల్యే అభ్యర్థిగా పోటీ చేస్తున్న తన స్నేహితుడు రవిచంద్ర కిషోర్ రెడ్డికి శుభాకాంక్షలు తెలిపేందుకు.. అల్లు అర్జున్ శనివారం ఉదయం నంద్యాలకు చేరుకోనున్నారు. బన్నీ సతీమణి స్నేహా రెడ్డి కూడా రానున్నారు. నంద్యాలకు వచ్చి మరీ తన స్నేహితుడికి బన్నీ బెస్ట్ విషెస్ చెబుతుండటంతో రవిచంద్ర కిషోర్ రెడ్డి అభిమానులు హర్షం వ్యక్తం చేస్తున్నారు. బన్నీకి ఘన స్వాగతం పలికేందుకు ఆయన ఫ్యాన్స్ రెడీ అవుతున్నారు.

ఓ వైపు జనసేన అధినేత పవన్ కళ్యాణ్ కు మద్దతు పలికి.. ఇప్పుడు వైసీపీ అభ్యర్థిగా పోటీ చేస్తున్న రవిచంద్ర కిషోర్‌ కు శుభాకాంక్షలు తెలిపేందుకు అల్లు అర్జున్ వెళ్తుండటం ప్రస్తుతం చర్చనీయాంశంగా మారింది. అయితే స్నేహితుడు కావడంతోనే రవిచంద్రకు బన్నీ విషెస్ చెప్పడానికి వెళ్తున్నట్లు తెలుస్తోంది. మరి నంద్యాలలో అల్లు అర్జున్ తన భార్యతో కలిసి ఎన్నికల ప్రచారం చేస్తారో లేక కేవలం శుభాకాంక్షలు చెప్పి వస్తారో చూడాలి.