పుష్ప 2.. ఎక్కడి వరకు వచ్చిందంటే..

ఐకాన్ స్టార్ అల్లు అర్జున్ హీరోగా సుకుమార్ దర్శకత్వంలో రెడీ అవుతోన్న మోస్ట్ అవైటెడ్ మూవీ పుష్ప ది రూల్ షూటింగ్ స్టేజ్ లో ఉంది. గత మూడేళ్లుగా ఈ మూవీ ప్రొడక్షన్ దశలోనే కొనసాగుతోంది. పర్ఫెక్షన్ కి మారుపేరైన సుకుమార్ పుష్ప 2 విషయంలో ప్రతి విషయాన్ని ఒకటికి మూడు సార్లు చెక్ చేసుకుంటూ కథని పకడ్బందీగా సిల్వర్ స్క్రీన్ పై ఆవిష్కరించే ప్రయత్నం చేస్తున్నారు. పుష్ప మూవీలో పుష్ప రాజ్ క్యారెక్టర్ గాను అల్లు అర్జున్ కి బెస్ట్ యాక్టర్ గా నేషనల్ అవార్డు వచ్చింది.

అలాగే మ్యూజిక్ డైరెక్టర్ గా దేవిశ్రీ ప్రసాద్ కూడా నేషనల్ అవార్డు అందుకున్నాడు. ఈ అవార్డులు సుకుమార్ మీద మరింత బాధ్యతని పెంచాయి. అందుకే పుష్ప సీక్వెల్ గా రెడీ అవుతోన్న పుష్ప ది రూల్ విషయంలో ఎక్కువ కేర్ తీసుకుంటున్నారు. దేశ వ్యాప్తంగా పుష్ప ది రూల్ పై హై ఎక్స్ పెక్టేషన్స్ ఉన్నాయని సుకుమార్ భావిస్తున్నారు. వారిని ఏ పాయింట్ లో కూడా డిజప్పాయింట్ చేయకూడదని ఈ సినిమాని ఒక శిల్పంలా చెక్కుతున్నారు.

సమయం ఎక్కువ తీసుకున్న కూడా మూవీ దేశ వ్యాప్తంగా ఒక ఒక ట్రెండ్ క్రియేట్ చేయడం గ్యారెంటీ అనే టాక్ వినిపిస్తోంది. అయితే కొద్ది రోజుల క్రితం పుష్ప 2 షూటింగ్ విషయంలో బన్నీ, సుకుమార్ కి మధ్య క్లాషెస్ వచ్చాయని, గ్యాప్ పెరిగిందనే ప్రచారం తెరపైకి వచ్చింది. చాలా రోజులు ఈ గాసిప్స్ నడిచాయి. అయితే వీటిలో వాస్తవం లేదని తరువాత బన్నీ వాస్ క్లారిటీ ఇచ్చాడు.

త్వరలో షూటింగ్ మళ్ళీ మొదలుకాబోతోందని తెలియజేశాడు. అయితే బన్నీకి సంబందించిన సీక్వెన్స్ షూట్ 15 రోజులు మాత్రమే పెండింగ్ ఉందని బన్నీ వాస్ తెలిపాడు. సుకుమార్ ప్రస్తుతం ఫాహద్ ఫాజిల్ కి సంబందించిన సీక్వెన్స్ తో పాటు మిగిలిన పెండింగ్ పార్ట్ అంతా కంప్లీట్ చేసిన తర్వాత బన్నీ షూట్ మొదలెడతారని చెప్పారు. ఇదిలా ఉంటే తాజాగా హైదరాబాద్ లో ప్రత్యేకంగా వేసిన సెట్స్ లో పుష్ప ది రూల్ క్లైమాక్స్ షూట్ జరుగుతుందని రెండు వీడియోస్ బయటకొచ్చాయి.

అల్లు అర్జున్ ఇంటికి సంబందించిన సీన్స్ తో పాటు యాక్షన్ ఘట్టాలు షూట్ చేస్తున్నారంట. వీటిని బన్నీ ఫ్యాన్స్ ఎవరో ట్విట్టర్ లో షేర్ చేశారు. అవి ఇప్పుడు వైరల్ అవుతున్నాయి. ఈ వీడియోలపై బన్నీ అభిమానుల నుంచి భిన్నమైన కామెంట్స్ వస్తున్నాయి. వెంటనే వీడియోని తొలగించాలని పోస్టులు పెడుతున్నారు. ఈ వీడియోలలో ఒకదానిలో క్రేన్, రోప్ ఉపయోగించి యాక్షన్ సన్నివేశాలు ఏవో షూట్ చేస్తున్నట్లు ఉంది. మరో దాంట్లో రష్మిక, అల్లు అర్జున్ ఫోటో ఫ్రేమ్స్ గోడ మీద ఉన్నాయి.