అయోధ్యలో మెగాస్టార్ 14.50 కోట్ల ఖ‌రీదైన ప్లాట్‌

అయోధ్య‌లో రామ‌మందిర విగ్ర‌హ ప్ర‌తిష్ఠాప‌న కార్య‌క్ర‌మానికి టాలీవుడ్ మెగాస్టార్ చిరంజీవి, ఆయ‌న వార‌సుడు రామ్ చ‌ర‌ణ్ కుటుంబ స‌మేతంగా అటెండ‌వుతున్న సంగ‌తి తెలిసిందే. అటువైపు బాలీవుడ్ మెగాస్టార్ అమితాబ్ బ‌చ్చ‌న్ స‌హా ప‌లువురు అగ్ర క‌థానాయ‌కులు, క‌థానాయిక‌లు, సినీప్ర‌ముకులు ఈనెల 22న జ‌ర‌గ‌నున్న ప్రారంభోత్స‌వ వేడుక‌ల‌కు హాజ‌ర‌వుతున్నారు.

ఇంత‌లోనే ఒక మెగా వార్త మీడియాలో సంచ‌ల‌నంగా మారింది. ఈ వార్త సారాంశం ప్ర‌కారం.. మెగాస్టార్ అమితాబ్ బచ్చన్ అయోధ్యలో రామాలయ విగ్ర‌హ‌ ప్రతిష్ఠాప‌న‌కు కొన్ని రోజుల ముందు దాదాపు 930 చదరపు మీటర్ల (10,000 చ.అడుగులు) స్థలాన్ని కొనుగోలు చేసినట్లు అధికారులు తెలిపారు.

ది హౌస్ ఆఫ్ అభినందన్ లోధా (HoABL)- ముంబై సంస్థ‌ పథకంలో భాగంగా పవిత్ర యాత్రాస్థ‌లంలో ప్లాట్‌ను రూ. 14.50 కోట్లకు లెజెండ్ అమితాబ్ కొనుగోలు చేసార‌ని తెలిసింది. ఇది `గ్లోబల్ స్పిరిచ్యువల్ క్యాపిటల్`గా పిలుచుకునే గృహాల స‌ముదాయం. లార్డ్ రామ్ టెంపుల్ నుండి ఈ ప్రాపర్టీ కేవలం 15 నిమిషాల దూరంలో ఉంది. కొత్త శ్రీరామ్ అంతర్జాతీయ విమానాశ్రయం నుండి 30 నిమిషాల దూరంలో ఉంది. సరయు నది ఒడ్డున ఉన్న `ది సరయు` అనే 7-నక్షత్రాల-రేటెడ్ 51 ఎకరాల మిక్స్-యూజ్ పోష్ కాంప్లెక్స్‌ను HoABL అభివృద్ధి చేస్తోందని కంపెనీ ప్రతినిధి తెలిపారు.

``నా హృదయంలో ప్రత్యేక స్థానాన్ని కలిగి ఉన్న అయోధ్యలో- అభినందన్ లోధా హౌస్‌తో ఈ ప్రయాణాన్ని ప్రారంభించాలని నేను ఎదురుచూస్తున్నాను. అయోధ్య కాలాతీతమైన ఆధ్యాత్మికత సాంస్కృతిక గొప్పతనం భౌగోళిక సరిహద్దులను దాటి భావోద్వేగ సంబంధాన్ని ఏర్పరిచిన న‌గ‌రం``అని 81 ఏళ్ల బచ్చన్ అన్నారు. గ్లోబల్ ఆధ్యాత్మిక రాజధానిలో నా ఇంటిని నిర్మించాలని నేను ఎదురు చూస్తున్నాను అని బచ్చన్ తెలిపారు. ఉత్తర ప్రదేశ్‌లో తన కుటుంబ వృక్ష మూలాలను కలిగి ఉన్నాన‌ని తెలిపాడు. ప్రయాగ్‌రాజ్ (గతంలో అలహాబాద్)లో జన్మించిన అమితాబ్ అక్కడే చదువుకున్నాడు. HoABL లెగసీలో స్మారక అధ్యాయమైన సరయు `ఫస్ట్ సిటిజన్`గా మిస్టర్ అమితాబ్ బచ్చన్‌ను స్వాగతించడంపై కంపెనీ థ్రిల్లింగ్‌గా ఉంది అని లోధా ప్ర‌తినిధులు అన్నారు. సరయు ప్రాజెక్ట్ మార్చి 2028 నాటికి పూర్తి కావాల్సి ఉంది. 2023 జూలైలో UP గ్లోబల్ ఇన్వెస్టర్స్ సమ్మిట్‌లో అయోధ్య కోసం HoABL రూ. 1,200 కోట్ల ప్రత్యేక పెట్టుబడితో ప్రాజెక్ట్ నిర్మిస్తున్న‌ట్టు ప్ర‌క‌టించింది.