నేను ఎప్పుడూ అలా చేయలేదు
టాలీవుడ్‌ తో పాటు కోలీవుడ్‌ లో గత కొంత కాలంగా స్టార్ హీరోల సూపర్‌ హిట్ సినిమాలు, క్లాసిక్ హిట్స్ సినిమాల రీ రిలీజ్ ట్రెండ్‌ కొనసాగుతున్న విషయం తెల్సిందే.
By: Tupaki Desk | 2 Sep 2024 11:30 PM GMT
టాలీవుడ్‌ తో పాటు కోలీవుడ్‌ లో గత కొంత కాలంగా స్టార్ హీరోల సూపర్‌ హిట్ సినిమాలు, క్లాసిక్ హిట్స్ సినిమాల రీ రిలీజ్ ట్రెండ్‌ కొనసాగుతున్న విషయం తెల్సిందే. ఇప్పటికే చాలా మంది స్టార్ హీరోల హిట్ సినిమాలు, కొన్ని ప్లాప్ సినిమాలు కూడా రీ రిలీజ్ అయ్యాయి. ఇటీవల చిరంజీవి నటించిన ఇంద్ర రీ రిలీజ్ అవ్వగా, పవన్ బర్త్‌ డే సందర్భంగా గబ్బర్ సింగ్‌ రీ రిలీజ్ అయ్యింది. ఆ మధ్య విజయ్ నటించిన గిల్లీ సినిమా కూడా రీ రిలీజ్ అయ్యి భారీ విజయాన్ని సొంతం చేసుకుంది. రీ రిలీజ్ ట్రెండ్‌ బాలీవుడ్ లో కూడా మెల్ల మెల్లగా షురూ అయ్యేలా ఉంది.
తాజాగా హిందీ సూపర్‌ హిట్ క్లాసిక్ మూవీ షోలే రీ రిలీజ్ అయింది. బాలీవుడ్ మెగాస్టార్ అమితాబచ్చన్‌, ధర్మేంద్ర, హేమామాలిని తదితరులు నటించిన షోలే సినిమా ఎవర్‌గ్రీన్‌ ఆల్‌ టైమ్‌ బిగ్గెస్ట్‌ బ్లాక్‌ బస్టర్ క్లాసికల్‌ హిట్ అనడంలో సందేహం లేదు. అలాంటి షోలే సినిమా తాజాగా రీ రిలీజ్ అయ్యింది. ఆ సందర్భంగా బాలీవుడ్ స్టార్స్ కోసం ప్రత్యేక షో ను ఏర్పాటు చేయడం జరిగింది. ఆ ప్రత్యేక షో కి అమితాబచ్చన్‌ హాజరు అయ్యాడు. షోలే రీ రిలీజ్ పై అమితాబచ్చన్‌ ఆసక్తికర వ్యాఖ్యలు చేశాడు. ఆయన తన బ్లాగ్‌ లో సినిమా రీ రిలీజ్ గురించి చెప్పుకొచ్చాడు.
అమితాబ్ తన బ్లాగ్‌ లో.... నేను ఎప్పుడూ మొబైల్ లో సినిమాను చూడలేదు. పాత సినిమాలు, పాటలు ఇంటర్నెట్‌ లో అందుబాటులో ఉన్నప్పటికీ వాటిని వెండి తెరపై చూడాలని ప్రేక్షకులు కోరుకుంటున్నారు. సినిమా థియేటర్ ఎక్స్‌పీరియన్స్ ను వారు ఎప్పటికీ వదులుకోరు. నాకు మొబైల్ లో సినిమా లేదా పాటలు చూడాలి అనే ఆలోచన కూడా ఎప్పుడూ రాలేదు. పాతది బంగారమో లేదా బంగారమే పాతది అయిందో కానీ ప్రతీది ముఖ్యమే అన్నట్లుగా రాసుకొచ్చాడు. ప్రస్తుతం ఆయన పోస్ట్‌ సోషల్‌ మీడియాలో తెగ వైరల్‌ అవుతోంది.
హిందీ లో ఇప్పటికీ వరుసగా సినిమాలు చేస్తున్న అమితాబచ్చన్‌ ఇటీవల టాలీవుడ్‌ మూవీ క్కలి 2898 ఏడీ సినిమాలో నటించాడు. అశ్వథామ పాత్రలో అమితాబ్ నటించిన తీరుకు విమర్శకుల ప్రశంసలు దక్కాయి. కల్కి 2 లో అమితాబ్ పాత్ర అంతకు మించి ఉండాలని ఫ్యాన్స్ కోరుకుంటున్నారు. సౌత్‌ లో అమితాబ్ మరో సినిమాను చేసేందుకు కమిట్‌ అయ్యాడు. తమిళ్ సూపర్‌ స్టార్ రజినీకాంత్‌ నటించబోతున్న భారీ బడ్జెట్‌ సినిమాలో అమితాబ్ కీలక పాత్రలో కనిపించబోతున్నట్లు తెలుస్తోంది. మరో వైపు సల్మాన్‌ ఖాన్‌ హీరోగా అట్లీ దర్శకత్వంలో రూపొందబోతున్న ఒక సినిమాలో కూడా అమితాబ్ కీలక పాత్రలో నటించే అవకాశాలు ఉన్నాయనే వార్తలు బాలీవుడ్ మీడియాలో కథనాలు వస్తున్నాయి. పూర్తి వివరాలు తెలియాల్సి ఉంది.
