మోత మోగిస్తున్న అంబాజీపేట బ్యాండు

ఈ మధ్య చిన్న సినిమాలు బాక్సాఫీస్ వద్ద కాసుల వర్షం కురిపిస్తున్న విషయం తెలిసిందే. ఇటీవలే హనుమాన్ మూవీ బాక్సాఫీస్ కలెక్షన్లతో రికార్డులు సృష్టించింది. తాజాగా మరో చిన్న చిత్రం మంచి వసూళ్లు రాబడుతోంది. యువ నటుడు సుహాస్ నటించిన అంబాజీపేట మ్యారేజి బ్యాండు పాజిటివ్ టాక్ తో దూసుకుపోతోంది.

కంటెంట్ బాగున్న సినిమాకు విజయం తప్పకుండా దక్కుతుందని మరోసారి ఈ సినిమా ప్రూవ్ చేసింది. ఫిబ్రవరి 2వ తేదీన ప్రేక్షకుల ముందుకొచ్చిన ఈ చిత్రం.. ప్రీమియర్ షోస్ నుంచే పాజిటివ్ టాక్ అందుకుంది. మొదటి రోజు ప్రపంచవ్యాప్తంగా ఈ మూవీ రూ.2.28 కోట్ల గ్రాస్ సాధించడంతో మేకర్స్ ఫుల్ ఖుషీ అయ్యారు.

మంచి టాక్ రావడంతో రెండో రోజు కూడా భారీ వసూళ్లు రాబట్టింది ఈ సినిమా. రెండు రోజుల్లో ఈ మూవీకి వరల్డ్ వైడ్ గా 5.16 కోట్ల రూపాయల గ్రాస్ కలెక్షన్స్ వచ్చినట్లు చిత్ర బృందం అధికారికంగా ప్రకటించింది. హార్డ్ హిట్టింగ్ బ్లాక్ బస్టర్ అంటూ స్పెషల్ పోస్టర్ రిలీజ్ చేసింది. ఇక ఈ సినిమా ఊహించిన దానికంటే పెద్ద విజయం సాధించడంతో చిత్ర యూనిట్ సక్సెస్ టూర్ కూడా ప్లాన్ చేసింది.

మరోవైపు, ఆదివారం.. ఈ సినిమా అన్ని సెంటర్లలో హౌస్ ఫుల్ అయినట్లు తెలుస్తోంది. దీంతో వసూళ్లు మరింత పెరిగే అవకాశం ఉందని ట్రేడ్ వర్గాలు అంచనా వేస్తున్నాయి. నేచురల్ స్టోరీ, ఎమోషన్, నటీనటుల యాక్టింగ్ ఇలా ఈ అంశాలన్నీ అంబాజీపేట మ్యారేజి బ్యాండును సూపర్ హిట్ చేశాయని సినీ పండితులు చెబుతున్నారు.

కులాల మధ్య అంతరాలు, లవ్ స్టోరీ ప్రధాన అంశాలుగా తెరకెక్కిన ఈ చిత్రంలో సుహాస్ సరసన శివానీ నగారం హీరోయిన్‍ గా నటించారు. గోపరాజు రమణ, శరణ్య ప్రదీప్, జగదీష్ ప్రతాప్ బండారి, స్వర్ణకాంత్, నితిన్ ప్రసన్న కీలకపాత్రల్లో కనిపించారు. మొదటి చిత్రాన్నే పరిణితితో తెరకెక్కించిన డైరెక్టర్ దుష్యంత్ పై ప్రశంసలు కురుస్తున్నాయి. ఈ మూవీకి శేఖర్ చంద్ర సంగీతం అందించారు.