క్రూయిజ్ షిప్‌లో అంబానీల పార్టీకి బ‌య‌ల్దేరిన స్టార్లు

గుజరాత్- జామ్‌నగర్‌లో రాధిక మర్చంట్‌తో ముఖేష్ - నీతా అంబానీల కుమారుడు అనంత్ అంబానీ ప్రీవెడ్డింగ్ వేడుక‌లకు కొన‌సాగింపు ఉత్స‌వాల‌ను క్రూయిజ్ షిప్‌లో మ‌రింత గ్రాండ్ గా ప్లాన్ చేసిన సంగ‌తి తెలిసిందే. కాబోయే వ‌ధూవ‌రులు ఇప్ప‌టికే ఇట‌లీ చేరుకున్నారు. ఈ ప్రీ-వెడ్డింగ్ వేడుక 3 రోజుల పాటు క్రూయిజ్ షిప్‌లో స‌ముద్ర‌పు అల‌ల‌పై జరుగుతుంది.. ఈ విలాస‌వంత‌మైన‌ క్రూయిజ్ ఇటలీ నుండి ఫ్రాన్స్‌కు వెళ్లనుంది. ఈ పార్టీకోసం బాలీవుడ్ నుంచి చాలా మంది ప్ర‌ముఖులు ఇప్ప‌టికే బ‌య‌ల్దేరారు.

అంబానీలతో చాలా సన్నిహితంగా ఖాన్ లు అంతా ఈ ప్రీవెడ్డింగ్ కి హాజ‌రు కానున్నార‌ని స‌మాచారం. ముందుగా కండ‌ల హీరో సల్మాన్ ఖాన్ ఇట‌లీ బ‌య‌ల్దేరిన‌ప్ప‌టి ఫోటోలు వైర‌ల్ అయ్యాయి. అత‌డి చుట్టూ విమానాశ్ర‌యంలో ఒక వ‌ల‌యంలో భ‌ద్ర‌తా సిబ్బంది హంగామా క‌నిపించింది. అలాగే అంబానీల‌కు స‌న్నిహితంగా ఉండే అలియా భట్ -రణబీర్ కపూర్ సోమవారం తెల్లవారుజామున విమానాశ్రయంలో కనిపించారు. ఈ దంపతులు తమ కుమార్తె రాహాతో కలిసి ఇటలీకి వెళ్లారు. విమానాశ్రయంలో ఈ ఫ్యామిలీ కెమెరాల‌కు ఫోజులిచ్చారు. రణబీర్ తెల్లటి టీ షర్ట్, లేత గోధుమరంగు ప్యాంట్‌లో క్లీన్ షేవ్ లుక్‌తో కనిపించాడు. అదే సమయంలో అలియా సాధారణ అవతార్‌లో కనిపించింది. తెల్లటి టాప్‌లో అందంగా కనిపించిన రాహా ఎప్పటిలాగే షోస్టాప‌ర్ గా నిలిచింది. ఇక ఎన‌ర్జిటిక్ హీరో ర‌ణ‌వీర్ సింగ్ విమానాశ్ర‌యంలో బ‌య‌ల్దేరుతూ క‌నిపించ‌గా, కాబోయే మ‌మ్మీ దీపిక ప‌దుకొనే ఈ ప్ర‌యాణానికి స్కిప్ కొట్టింద‌ని అర్థ‌మ‌వుతోంది. మరోవైపు బిగ్ బాస్ షోలో సల్మాన్ తో సంద‌డి చేసిన ఒర్రీ అలియాస్ ఓర్హాన్ అవ్ర‌త‌మ‌ణి కూడా ఈ పార్టీకి వెళుతూ క‌నిపించాడు. షారూఖ్ కేకేఆర్ మ్యాచ్ లో విక్ట‌రీని సెల‌బ్రేట్ చేస్తూ బిజీగా ఉన్నాడు. ఇక అత‌డు బ‌య‌ల్దేరే స‌మ‌యం ఆస‌న్నం కాగా, అమీర్ ఖాన్ ప్ర‌యాణం ఎప్పుడో తెలియాల్సి ఉంది. ఇక తెలుగు చిత్ర‌సీమ నుంచి ప్రముఖుల‌కు ఆహ్వానం అందిందా లేదా? అన్న‌ది ఇంకా వెల్ల‌డికావాల్సి ఉంది.

ఈ రెండవ ప్రీ-వెడ్డింగ్ పార్టీ మే 28 నుంచి మే 30వ‌ర‌కూ మూడు రోజు పాటు ఇటలీ నుండి దక్షిణ ఫ్రాన్స్‌కు ప్రయాణిస్తున్న లగ్జరీ క్రూయిజ్‌లో జరుగుతుంది. బాలీవుడ్ ఎ-లిస్టర్‌లు , అంతర్జాతీయ ప్రముఖులను కలిగి ఉన్న అతిథుల‌ జాబితా గురించి ఇప్ప‌టికే ఆస‌క్తిక‌ర చ‌ర్చ సాగుతోంది. ఈ వేడుకలో అగ్రశ్రేణి కళాకారుల ప్రదర్శనలు .. అన్నింటికంటే గొప్ప వంటకాలతో ప్ర‌త్యేక‌త‌ను సంత‌రించుకోనుంది.

అనంత్, రాధికల పెళ్లి జూలైలో జరగనుంది. జామ్ న‌గ‌ర్ లో మొద‌టి ప్రీవెడ్డింగ్ కోసం సుమారు 1000 కోట్లు ఖ‌ర్చు చేసిన అంబానీలు క్రూయిజ్ షిప్ ప్రీవెడ్డింగ్ కోసం 500 కోట్లు పైగా ఖ‌ర్చు చేయ‌నుంద‌ని టాక్ వినిపిస్తోంది. ఈ వేడుక‌ల్లో 100 మంది పైగా అంత‌ర్జాతీయ కార్పొరెట్ దిగ్గ‌జాలు పాల్గొనేందుకు అవ‌కాశం ఉంద‌ని కూడా తెలుస్తోంది.