మెగా అల్లుడు సినిమాలో తెలుగ‌మ్మాయి!

తెలుగు అమ్మాయిల‌కు అవ‌కాశాలు క‌ల్పించ‌డంలో టాలీవుడ్ లో చాలా మార్పులొచ్చిన సంగ‌తి తెలిసిందే. గ‌తంలో పూర్తిగా ఇత‌ర రాష్ట్రాల భామ‌ల్నే ఎంపిక చేసుకునే వారు. కానీ ఇప్పుడా ట్రెండ్ మారింది. తెలుగు న‌టీమ‌ణుల‌కు అవ‌కాశాలు బాగానే క‌ల్పిస్తున్నారు. `బేబి` సినిమాతో వైష్ణ‌వి వెలుగులోకి వ‌చ్చిన సంగ‌తి తెలిసిందే. అంత‌కు ముందు అంజ‌లి కూడా త‌మిళ్ లో స‌క్సెస్ అవ్వ‌డంతో తెలుగులో అవ‌కాశాలు వ‌చ్చాయి.

అలాగే న‌వ‌త‌రం క్యారెక్ట‌ర్ ఆర్టిస్టుల‌కు కూడా బాగానే అవ‌కాశాలు ఇస్తున్నారు. సినిమాల్లో కీల‌క పాత్ర‌ల‌కు..సైడ్ పాత్రల‌కు తెలుగు వారినే ఎంపిక చేస్తున్నారు. తెలంగాణ ప్రాంతానికి చెందిన అన‌న్య నాగ‌ళ్ల కూడా ఇలాగే వెలుగులోకి వ‌చ్చింది. షార్ట్ ఫిలిం ద్వారా వెలుగులోకి వ‌చ్చిన అమ్మ‌డు ట్యాలెంట్ చూసి అటుపై సినిమాల్లో అవకా శాలు అందుకుంది. ప‌వ‌ర్ స్టార్ ప‌వ‌న్ క‌ళ్యాణ్ హీరోగా న‌టించిన `వ‌కీల్ సాబ్` సినిమాలో అన‌న్య ఓకీల‌క పాత్ర పోషించిన సంగ‌తి తెలిసిందే.

ఆ సినిమా అమ్మ‌డికి తెలుగులో మంచి గుర్తింపు తీసుకొచ్చింది. అప్ప‌టికే కొన్ని సినిమాలు చేసినా? తొలిసారి ఓ పెద్ద సినిమా అందులోనూ పీకే తో క‌లిసి న‌టించే ఛాన్స్ కావ‌డంతో? మంచి గుర్తింపు ద‌క్కింది. తాజాగా అన‌న్యాకు మెగా మేన‌ల్లుడు సాయిదుర్గ‌తేజ్ కూడా అవ‌కాశం క‌ల్పించాడు. సాయితేజ్ హీరోగా రోహిత్ కె.పి ద‌ర్శ‌క‌త్వంలోఓ పాన్ ఇండియా సినిమా తెరెక్కుతోన్న సంగ‌తి తెలిసిందే. ఇందులో హీరోయిన్ గా ఐశ్వ‌ర్య లక్ష్మిని తీసుకున్నారు.

సినిమాలో మ‌రో కీల‌క‌మైన రోల్ ఉండ‌టంతో ఆ పాత్రం కోసం అన‌న్యా నాగ‌ళ్ల‌ను తీసుకున్నారు. అన‌న్య ఆపాత్ర‌కు ప‌ర్పెక్ట్ గా సూట‌వుతుంద‌ని హీరో-ద‌ర్శ‌కుడు ఫిక్సై ఛాన్స్ ఇచ్చిన‌ట్లు తెలుస్తోంది. సాయితేజ్ హీరోగా న‌టించిన చిత్రాల్లో ఇత వ‌ర‌కూ తెలుగు భామ‌లు క‌నిపించింది లేదు. తొలిసారి అన‌న్య‌కి అత‌డి చిత్రంలో ఛాన్స్ ఇచ్చి విమ‌ర్శ‌కుల ప్ర‌శంస‌లు అందుకుంటున్నారు. తెలుగు వాళ్ల‌కు తెలుగు వారే స‌హ‌క‌రించాల‌ని ఈ సంద‌ర్భంగా కోర‌తున్నారు.