నా సినిమా హీరో నిజంగా హీరో..!

బాలీవుడ్‌ స్టార్‌ హీరో రణబీర్ కపూర్ తో మన తెలుగు దర్శకుడు సందీప్ వంగ తెరకెక్కించిన యానిమల్‌ సినిమా మరో వారం రోజుల్లో ప్రేక్షకుల ముందుకు రాబోతుంది. నేషనల్ క్రష్ రష్మిక మందన్న ఈ సినిమాలో హీరోయిన్ గా నటించగా, బాలీవుడ్‌ లెజెండ్రీ స్టార్‌ అనిల్ కపూర్‌ కీలక పాత్రలో కనిపించబోతున్న విషయం తెల్సిందే.

సాధారణంగా ఏ సినిమా ప్రమోషన్ లో అయినా కూడా హీరో పై దర్శకుడు ఆహా.. ఓహో అంటూ ప్రశంసలు కురిపించడం, దర్శకుడిపై కూడా హీరో ప్రశంసలు కురిపించడం వంటివి చూస్తూ ఉంటాం. అయితే యానిమల్‌ సినిమా ప్రమోషన్ లో అది కాస్త ఎక్కువ అయిందేమో అనిపిస్తుంది అంటూ నెటిజన్స్ కొందరు అభిప్రాయం వ్యక్తం చేస్తున్నారు.

తాజాగా దర్శకుడు సందీప్ వంగ ఒక చిట్ చాట్‌ లో మాట్లాడుతూ హీరో రణబీర్ కపూర్ ను ఆకాశానికి కాకుండా అంతకు మించి అన్నట్లుగా ఎత్తేశాడు. ప్రశంసల విషయంలో పతాక స్థాయికి చేరి పోయాడు. సందీప్ వంగ మాట్లాడుతూ.. తన దృష్టిలో ప్రపంచ ప్రసిద్ది గాంచిన నటులు అయిన రోబర్ట్‌ డెనిరో, అల్‌ ప్యాచినో, కమల్‌ హాసన్‌ లను కలిపితే రణబీర్‌ కపూర్ అవుతాడు.

అంతటి గొప్ప నటుడు రణబీర్ కపూర్. ఈ సినిమాతో ఆయన తో వర్క్‌ చేయాలనే కోరిక తీరడం చాలా సంతోషంగా ఉంది. రణబీర్‌ కపూర్ నటించిన రాక్ స్టార్‌ సినిమా చూసి షాక్ అయ్యాను. అందులోని రణబీర్ నటన అద్భుతం. ఒకే రోజు రెండు సార్లు ఆ సినిమాను చూశాను అంటూ సందీప్‌ వంగ పేర్కొన్నాడు.

మొత్తానికి రణబీర్‌ కపూర్ గురించి సందీప్ వంగ చేసిన వ్యాఖ్యలు ప్రస్తుతం అందరి దృష్టిని ఆకర్షిస్తున్నాయి. నటుడిగా అంతటి ఖ్యాతి, గౌరవం రణబీర్ కపూర్‌ కు ఇవ్వడం సమంజసం అంటూ కొందరు కామెంట్స్ చేస్తూ ఉంటే కొందరు మాత్రం మరీ ఇంతగా వ్యక్తి పూజ అవసరమా అన్నట్లుగా కామెంట్స్ చేస్తున్నారు.