'యానిమల్‌' లో ఆ సీన్స్ అన్నకి నచ్చలేదట!

రణబీర్ కపూర్‌ హీరోగా రష్మిక మందన్న హీరోయిన్‌ గా సందీప్ వంగ దర్శకత్వంలో రూపొంది ఇటీవలే ప్రేక్షకుల ముందుకు వచ్చిన యానిమల్‌ సినిమా వరల్డ్‌ బాక్సాఫీస్ వద్ద ఏకంగా రూ.800 కోట్ల వసూళ్లు నమోదు చేసింది. ఈ వీకెండ్‌ పూర్తి అయ్యేప్పటి వరకు వెయ్యి కోట్ల వసూళ్లను ఈ సినిమా దక్కించుకునే అవకాశాలు పుష్కలంగా ఉన్నాయి అంటూ బాక్సాఫీస్ వర్గాల వారు అంటున్నారు.

సినిమాకు ఈ రేంజ్ లో వసూళ్లు వస్తున్నా కూడా చాలా మంది సినిమాలోని కొన్ని సన్నివేశాల పట్ల అసంతృప్తి వ్యక్తం చేస్తున్నారు. ఆ సన్నివేశాలు అస్సలు బాగాలేదు అంటూనే సినిమాను చూసేందుకు బాక్సాఫీస్ వద్ద క్యూ కడుతున్నారు. సినిమాలోని కొన్ని సన్నివేశాలకు నెగటివ్ రివ్యూలు వచ్చిన మాట వాస్తవం.

తాజాగా యానిమల్‌ సినిమాలో విలన్ పాత్రలో నటించిన బాబీ డియోల్‌ అన్న అయిన సన్నీ డియోల్‌ ఈ సినిమా గురించి స్పందించాడు. చాలా కాలం తర్వాత బాబీ డియోల్‌ కి యానిమల్‌ రూపంలో ఒక మంచి హిట్ లభించడం తో సన్నీ లియోన్ ఆనందం వ్యక్తం చేశాడు. బాబీ డియోల్‌ యానిమల్ లో మంచి నటన కనబర్చాడు అంటూ సన్నీ డియోల్ పేర్కొన్నాడు.

అయితే ఒక ప్రేక్షకుడిగా యానిమల్‌ సినిమాను చూసిన సమయంలో కొన్ని సన్నివేశాలు నాకు నచ్చలేదు అంటూ నిర్మొహమాటంగా చెప్పేశాడు. తాజాగా ఒక ఇంటర్వ్యూలో సన్నీ డియోల్‌ మాట్లాడుతూ.. యానిమల్ సినిమా ను చూశాను, చాలా బాగా నచ్చింది. అయితే సినిమాలోని కొన్ని సన్నివేశాల పట్ల నా అభిప్రాయంను చెప్పే హక్కు ప్రేక్షకుడిగా ఉంది. కనుక నేను సినిమాలో కొన్ని సన్నివేశాలు నచ్చలేదు అని చెబుతున్నాను అన్నాడు.

చాలా కాలం తర్వాత సన్నీ డియోల్‌ కూడా తన గదర్ 2 సినిమా తో సందడి చేశాడు. ఏకంగా ఆ సినిమా రూ.500 కోట్ల వసూళ్లు నమోదు చేసి అరుదైన రికార్డ్‌ ను నమోదు చేయడం జరిగింది. ఇప్పుడు తమ్ముడు బాబీ డియోల్‌ నటించిన సినిమా కూడా హిట్ అవ్వడంతో ఈ బ్రదర్స్ ఫ్యాన్స్ ఆనందం వ్యక్తం చేస్తున్నారు.