గ్లోబ‌ల్ స్టార్ గా మ‌రో బ్యూటీ!
తాజాగా ఆ జాబితాలోకి సీనియ‌ర్ న‌టి నేహాధూపియా చేరింది.
By: Tupaki Desk | 20 Dec 2023 2:30 PM GMT
గ్లోబ‌ల్ స్థాయిలో భార‌తీయుల హ‌వా రాను రాను పెరుగుతోన్న సంగ‌తి తెలిసిందే. ఇప్ప‌టికే ప్రియాంక చోప్రా..ఐశ్వ‌ర్యారాయ్...దీపికా ప‌దుకొణే..హ్యూమాఖురేషీ..టబు..అలియాభ‌ట్ లాంటి భామ‌లు అదృష్టాన్ని ప‌రీక్షించుకున్నారు. అయితే హాలీవుడ్ లో స్థిర‌ప‌డింది...ఎక్కువ‌గా ఫేమ‌స్ అయింది మాత్రం ప్రియాంక చోప్రానే. ఆమె లా మ‌రో న‌టి ఇంత‌వ‌ర‌కూ స‌క్సెస్ అయింది లేదు. తాజాగా ఆ జాబితాలోకి సీనియ‌ర్ న‌టి నేహాధూపియా చేరింది.
ఆమె ప్ర‌ధాన పాత్ర‌లో 'బ్లూ 52' అనే ఓ అంత‌ర్జాతీయ చిత్రం తెర‌కెక్క‌నుంది. ఈ ఎమోష‌న్ డ్రామాకి ఈజిప్షియ‌న్ ద‌ర్శ‌కుడు అలీ ఎల్. ఆర‌బీ ద‌ర్శ‌క‌త్వం వ‌హిస్తున్నారు. ఈయ‌న ఎన్నో ఫిక్ష‌న‌ల్ చిత్రాల‌కు ద‌ర్శ‌క‌త్వం వ‌హించారు. కేర‌ళ‌లోని కొచ్చి..ఖ‌తార్ దేశాల నేప‌థ్యంతో ఈ క‌థ సాగ‌నుంది. ఈ సంద‌ర్భంగా నేహా ధూపియా సంతోషం వ్య‌క్తం చేసింది. సినిమాకి ఎంపిక అవ్వ‌డం ఓ అద్భుతంలా అనిపిస్తుంది.
తొలిసారి భిన్న సంస్కృతుల ఉన్న క‌థ..భావోద్వేగాల‌ను పండిచే క‌థ‌లో న‌టించే అవ‌కాశం ద‌క్కింది. ప్ర‌పంచ వ్యాప్తంగా పేరున్న అలీ ద‌ర్శ‌క‌త్వంలో నా తొలి అంత‌ర్జాతీయ చిత్రం చేయ‌డం మ‌ర్చిపోలేను' అని అంది. నేహాధూపియా బాలీవుడ్ లో రెండు ద‌శాబ్ధ‌లుగా రాణిస్తోన్న సంగ‌తి తెలిసిందే. తొలుత జ‌ప‌నీస్ చిత్రంతో తెరంగేట్రం చేసింది. అటుపై' క్వాంట‌మ్ సిటీ అండ‌ర్ థ్రెట్' సినిమాతో బాలీవుడ్ లోకి ఎంట్రీ ఇచ్చింది.
అటుపై అమ్మ‌డి కెరీర్ వెన‌క్కి తిరిగి చూడ‌కుండా సాగిపోయింది. వ‌రుస విజ‌యాల‌తో న‌టిగా బిజీ అయింది. ఐటం బామ‌గానూ త‌న‌దైన మార్క్ వేసింది. కెరీర్ ఆరంభంలోనే తెలుగు సినిమాలోనూ లాంచ్ అయింది. 'నిన్నే ఇష్ట‌ప‌డ్డాను' అనే చిత్రంతో లాంచ్ అయింది. 'విల‌న్'..'ప‌ర‌మ‌వీర చ‌క్ర' లాంటి చిత్రాల్లో న‌టించింది.
