మన్మథుడి లవర్‌ కమర్షియల్‌ 'మజాకా'...!

నాగార్జున హీరోగా వచ్చిన మన్మథుడు సినిమాలో నటించిన ఇద్దరు హీరోయిన్స్ లో అన్షు ఒకరు అనే విషయం తెల్సిందే. మన్మథుడు సినిమాలో అన్షు కనిపించింది కొద్దిసేపే అయినా కూడా మంచి గుర్తింపును సొంతం చేసుకుంది. ఆ తర్వాత ప్రభాస్‌ తో కలిసి రాఘవేంద్ర సినిమాను చేసింది.

కెరీర్‌ ప్రారంభించిన కొన్నాళ్లకే అన్షు ఇండస్ట్రీ నుంచి కనుమరుగయ్యింది. అయినా కూడా ఆమె గురించి చర్చ మాత్రం జరుగుతూనే ఉంది. ఇన్నాళ్లు విదేశాల్లో ఉన్న అన్షు ఎట్టకేలకు సోషల్‌ మీడియా ద్వారా బయటకు కనిపించింది. గతంలో మాదిరిగానే అందంగా ఉన్న అన్షు మళ్లీ నటించేందుకు రెడీ అంటూ ప్రకటించింది.

తాజాగా త్రినాథరావు నక్కిన దర్శకత్వంలో రూపొందుతున్న 'మజాకా' అనే సినిమాలో నటించేందుకు కమిట్‌ అయ్యింది. ఆ సినిమాలో హీరోగా సందీప్‌ కిషన్ నటిస్తున్నాడు. రావు రమేష్ కీలక పాత్రలో కనిపించబోతున్నారు. విశ్వసనీయంగా అందుతున్న సమాచారం ప్రకారం రావు రమేష్ ప్రియురాలి పాత్రలో అన్షు కనిపించబోతుంది.

రావు రమేష్ మరియు అన్షు ల మధ్య ఉండే లవ్‌ స్టోరీ సినిమాకు ప్రధాన ఆకర్షణగా నిలుస్తుందని అంటున్నారు. మెయిన్ హీరో హీరోయిన్స్ స్థాయిలో వీరి స్క్రీన్‌ ప్రజెన్స్ ఉంటుందని, అంతే కాకుండా వీరిద్దరి కాంబో లవ్‌ సీన్స్ కమర్షియల్‌ ఎలిమెంట్స్ తో ఉంటాయని అంటున్నారు.

చాలా సంవత్సరాల తర్వాత ప్రేక్షకుల ముందుకు రాబోతున్న మన్మథుడి లవర్ అన్షు కి ఎలాంటి ఫలితం దక్కుతుంది అనేది చూడాలి. మజాకా సినిమా తో అన్షు హిట్‌ కొట్టగలిగితే ఖచ్చితంగా బ్యాక్ టు బ్యాక్‌ టాలీవుడ్‌ లో సినిమా ఆఫర్లు దక్కించుకునే అవకాశం ఉంది.