'ఘాటీ' గ్లింప్స్: కొడవలితో కిరాతకంగా పీకలు కోస్తున్న అనుష్క!

'మిస్ శెట్టి మిస్టర్ పోలిశెట్టి' వంటి బ్లాక్ బస్టర్ తర్వాత స్టార్ హీరోయిన్ అనుష్క శెట్టి ప్రధాన పాత్రలో నటిస్తున్న సినిమా ''ఘాటీ''. క్రిష్ జాగ‌ర్ల‌మూడి ద‌ర్శ‌క‌త్వంలో ఈ యాక్షన్ థ్రిల్లర్‌ తెరకెక్కుతోంది. 'వేదం' వంటి సక్సెస్ ఫుల్ మూవీ తరువాత వీరిద్దరూ కలిసి చేస్తున్న ఈ సినిమాపై అభిమానుల్లో మంచి అంచనాలు ఉన్నాయి. నేడు అనుష్క పుట్టిన రోజు సందర్భంగా మేకర్స్ రెండు క్రేజీ అప్డేట్స్ తో వచ్చారు. ఇప్పటికే ఫ‌స్ట్‌ లుక్‌ పోస్టర్ ను రిలీజ్ చెయ్యగా.. తాజాగా ఓ స్పెషల్ గ్లింప్స్ ను విడుదల చేసారు.

'ఘాటీ' ఫస్ట్ లుక్ లో అనుష్క శెట్టిని క్రూరమైన మాస్ అవతార్ లో ప్రెజెంట్ చేయగా.. ఇప్పుడు గ్లింప్స్ లో నెవర్ బీఫోర్‌ క్యారక్టర్ లో చూపించారు. సినిమాలో ఆమె పాత్ర ఎంత పవర్ ఫుల్ గా ఉంటుందనేది 47 సెకండ్ల వీడియోలో చూపించే ప్రయత్నం చేసారు. ఎలాంటి డైలాగ్స్ లేకుండా కేవలం విజువల్స్ తో అనుష్క పాత్రను మాత్రమే ఎలివేట్ చేసేలా ఈ గ్లింప్స్ కట్ చేసారు. అనుష్క ముసుగు వేసుకొని నడుచుకుంటూ వెళ్లి బస్సు ఎక్కడం, ఆమె చేతిలో ఉన్న కొడవలి లాంటి ఆయుధంతో అత్యంత కిరాతకంగా ఒకరి పీక కోయడం, తలని చేత్తో పట్టుకొని పొలాల్లో నడుచుకుంటూ వెళ్లడం, చివర్లో స్మోకింగ్ చేస్తూ ఇంటెన్స్ గా చూస్తూ నిలబడతానని ఈ వీడియోలో చూపించారు.

ఇందులో అనుష్క కాళ్లకు కడియాలు, చేతులకు పచ్చబొట్లు, రెండు ముక్కుపుడ‌కల‌తో ఒక ట్రైబ‌ల్ యువతి మాదిరిగా కనిపిస్తోంది. అయితే ఆమె తన శత్రువుల మీద పగ తీర్చుకోడానికి చాలా వైల్డ్ గా మారినట్లు తెలుస్తోంది. ఇది ఇప్పటి వరకూ అనుష్క పోషించిన పాత్రలకు భిన్నంగా, కంప్లీట్ మాసీ క్యారక్టర్ అని అర్థమవుతోంది. తలని చేత్తో పట్టుకొని నడుచుకుంటూ వస్తున్న షాట్ చూస్తే.. 'బాహుబలి 2'లో భల్లాల దేవుడి కొడుకు తల పట్టుకొని వస్తున్న సీన్ గుర్తుకు వస్తోంది.

'ఘాటీ' గ్లింప్స్ లో బ్యాగ్రౌండ్ స్కోర్ హైలైట్ గా నిలిచింది. విజువల్స్ ప్రధాన ఆకర్షణగా నిలిచాయి. బాధితురాలు, నేరస్థురాలు, లెజెండ్ అయిన ఒక స్త్రీ కథ ఇదని మేకర్స్ పేర్కొన్నారు. తనకు జరిగిన అన్యాయంపై ఒక మహిళ ఎలా ప్రతీకారం తీర్చుకుంది.. నేరస్థురాలుగా మారిన తర్వాత, తిరిగి ఆ ప్రాంతానికి వచ్చి ఒక పవర్ ఫుల్ క్వీన్ గా ఎలా ఎదిగిందనేది ఈ సినిమాలో చూడబోతున్నాం. 'వేదం'లో అనుష్కను వేశ్య పాత్రలో చూపించిన క్రిష్.. ఈ సినిమాలో ఆమెను హై-ఆక్టేన్ యాక్షన్ ప్యాక్డ్ క్యారక్టర్ లో చూపించబోతున్నట్లు స్పష్టమవుతోంది. ఇప్పటికైతే స్టన్నింగ్ ఫస్ట్ లుక్, గ్లిమ్ప్స్ ఆడియన్స్ ను విశేషంగా ఆకట్టుకున్నాయి.

యూవీ క్రియేషన్స్, ఫస్ట్‌ ఫ్రేమ్‌ ఎంటర్‌టైన్‌మెంట్‌ బ్యానర్స్ పై భారీ బడ్జెట్ తో అత్యున్నత సాంకేతిక ప్రమాణాలతో ప్రతిష్టాత్మకంగా ఈ చిత్రాన్ని నిర్మిస్తున్నారు. రాజీవ్ రెడ్డి, సాయిబాబు జాగర్లమూడి దీనికి నిర్మాతలు. నాగవెల్లి విద్యాసాగర్ సంగీతం సమకూరుస్తున్న ఈ చిత్రానికి మనోజ్‌ రెడ్డి కాటసాని సినిమాటోగ్రఫీ నిర్వహిస్తున్నారు. తోట తరణి ఆర్ట్ డైరెక్టర్ గా, చాణక్య రెడ్డి తూరుపు ఎడిటర్ గా వర్క్ చేస్తున్నారు. చింతకింది శ్రీనివాసరావు కథ అందించగా, సాయిమాధవ్ బుర్రా మాటలు రాశారు. ''ఘాటీ'' చిత్రాన్ని పాన్ ఇండియా స్థాయిలో తెలుగు, తమిళం, కన్నడ, మలయాళం, హిందీ భాషల్లో విడుదల చేయనున్నారు.