ఫ్యాక్ట్‌ చెక్‌ : మెగాస్టార్‌ కి జోడీగా మిస్ శెట్టి
తాజాగా మెగా కాంపౌండ్ నుండి క్లారిటీ వచ్చింది. ఇప్పటి వరకు చిరంజీవి 157వ సినిమాకు సంబంధించిన హీరోయిన్ లతో చర్చలు జరపలేదు అన్నారు.
By: Tupaki Desk | 16 Sep 2023 3:37 AM GMT
మెగాస్టార్‌ చిరంజీవి ఆ మధ్య బ్రో డాడీ చిత్రాన్ని రీమేక్ చేయబోతున్నట్లుగా వార్తలు వచ్చాయి. కానీ భోళా శంకర్ సినిమా నిరాశ పరచడం తో ఆ రీమేక్ నిర్ణయాన్ని ఉపసంహరించుకున్నట్లుగా తెలుస్తోంది. బ్రో డాడీ సినిమా రీమేక్ కాకుండా వశిష్ఠ్‌ దర్శకత్వంలో చిరంజీవి సినిమాను చేయబోతున్నాడు. యూవీ క్రియేషన్స్ బ్యానర్ లో ఈ సినిమా రూపొందబోతుంది.
ఈ సినిమా గురించి మీడియాలో రకరకాల పుకార్లు షికార్లు చేస్తున్నాయి. ఇప్పటికే విడుదల అయిన పబ్లిసిటీ స్టఫ్‌ తో ఇది ఒక సోషియో ఫాంటసీ మూవీ అన్నట్లుగా మెగా ఫ్యాన్స్ తో పాటు ప్రతి ఒక్కరు కూడా భావిస్తున్నారు. ఈ సమయంలోనే ఈ సినిమాలో హీరోయిన్ కు సంబంధించిన విషయాలు సోషల్‌ మీడియాలో వైరల్‌ అవుతున్నాయి.
బాలీవుడ్‌ హీరోయిన్ సోనాక్షి సిన్హా.. త్రిష.. అనుష్క ఇలా ఎంతో మంది హీరోయిన్స్ పేర్లు ప్రచారం జరిగాయి. ముఖ్యంగా మిస్ శెట్టి అనుష్క శెట్టి ఈ సినిమా లో నటించబోతుందనే ప్రచారం జరిగింది. తాజాగా మెగా కాంపౌండ్ నుండి క్లారిటీ వచ్చింది. ఇప్పటి వరకు చిరంజీవి 157వ సినిమాకు సంబంధించిన హీరోయిన్ లతో చర్చలు జరపలేదు అన్నారు.
అనుష్క ను మాత్రమే కాకుండా ఇప్పటి వరకు ఏ ఒక్క హీరోయిన్ ను కూడా సంప్రదించలేదు అన్నట్లుగా మెగా కాంపౌండ్ కు చెందిన వారు పేర్కొన్నారు. అనుష్క ఈ మధ్య కాలంలో కొత్త సినిమాలకు కమిట్ అవ్వడం లేదు. ఆమె అనారోగ్య కారణాలు ఇతర పరిస్థితుల కారణంగా ముందు ముందు సినిమాలు చేస్తుందా లేదా అనే అనుమానాలు వ్యక్తం అవుతున్నాయి.
బింబిసార సినిమాతో సూపర్ హిట్ ను దక్కించుకున్న దర్శకుడు వశిష్ఠ్‌ విభిన్నమైన కాన్సెప్ట్‌ తో చిరంజీవి హీరోగా సినిమా చేస్తున్న నేపథ్యంలో అందరికీ అంచనాలు భారీగా ఉన్నాయి. భారీ అంచనాలున్న ఈ సినిమా లో క్రేజీ హీరోయిన్ ను నటింపజేస్తే సినిమా స్థాయి మరింతగా పెరగడం ఖాయం. కనుక ఫ్యాన్స్ ఈ సినిమా హీరోయిన్ విషయంలో చాలా ఆసక్తి ని కనబరుస్తున్నారు.
