మిస్ శెట్టి మిస్టర్ పొలిశెట్టి.. మనసు మార్చుకున్న అనుష్క

అరుంధతి, రుద్రమదేవి వంటి సినిమాలతో హీరోయిక్ ఇమేజ్, ఫ్యాన్ ఫాలోయింగ్ సంపాదించుకున్న హీరోయిన్​ అనుష్క... బాహుబలితో భారీ ఇమేజ్​ను దక్కించుకుంది. అయితే ఆ తర్వాత ఆమె చేసిన భాగమతి, నిశబ్దం ఘోరంగా డిజాస్టర్​ టాక్​ను అందుకున్నాయి. దీంతో భారీ గ్యాప్ ఇచ్చిన ఆమె దాదాపు ఐదేళ్ల తర్వాత మిస్ శెట్టి మిస్టర్ పొలిశెట్టి సినిమాతో ప్రేక్షకుల ముందుకు రానుంది. అయితే ఈ సినిమా విషయంలో ఆమె ఎట్టకేలకు తన నిర్ణయాన్ని మార్చుకున్నట్లు తెలసుస్తోంది.

అదేంటంటే.. అనుష్క మొదటి నుంచి తన సినిమాలకు బాగానే ప్రమోషన్స్​లో పాల్గొనేది. కానీ బాహుబలి తర్వాత అంతగా కనిపించడం మానేసింది. ముఖ్యంగా ఇంటర్వ్యూలు కూడా ఇవ్వడం లేదు. ఇప్పుడు తాజాగా రిలీజవుతున్న మిస్ శెట్టి మిస్టర్ పొలిశెట్టి సినిమా ప్రమోషన్స్​లో ఎక్కడా కనపడట్లేదు. మూవీలో నటించిన హీరో నవీన్ పోలిశెట్టి మాత్రం రకరకాలుగా ప్రమోషన్స్​ చేస్తూ తిరుగుతున్నారు. ఇంటర్వ్యూలు కూడా ఇస్తున్నారు.

అయితే 'బాహుబలి' వరకు తన చిత్రాలను బాగానే ప్రమోట్ చేసిన అనుష్క.. ఆ తర్వాత తన ఫిజిక్​లో మార్పులు వచ్చాయని, అందుకే పబ్లిక్​ అప్పీయరెన్స్ ఇవ్వడానికి ఇబ్బంది పడుతోందని అప్పట్లో గుసగుసలు కూడా వినిపించాయి. ఏదేమైనప్పటికీ అసలు కారణం తెలీదు కానీ ఆమె ఇంటర్వ్యూలు ఇచ్చి చాలా కాలమైంది. దీంతో మిస్ శెట్టి మిస్టర్ పొలిశెట్టి ప్రమోషన్స్​లోనూ ఆమె పాల్గొనడం, ఇంటర్వ్యూలు ఇవ్వడం అనేది నిన్న మొన్నటివరకు అనుమానంగానే ఉంది.

కానీ ఇప్పుడు అనుష్క తన నిర్ణయాన్ని మార్చుకున్నట్లు తెలిసింది. ఓ వీడియో ఇంటర్వ్యూకు రెడీ అయిందని సమాచారం అందింది. ఇప్పటికే దాన్ని షూట్​ కూడా చేసేశారట. హీరో నవీన్ పోలిశెట్టితో కలిసి యూంకర్ సుమకు ఈ వీడియో ఇంటర్వ్యూ ఇచ్చిందని అంటున్నారు. త్వరలోనే ఇది రిలీజ్ కానున్నట్లు తెలుస్తోంది. ఇకపోతే ఈ సినిమా సెప్టెంబర్​ 7న ప్రేక్షకుల ముందుకు రానుంది.

ఈ సినిమాకు మహేష్‌బాబు.పి దర్శకత్వం వహించారు. నవీన్‌ పొలిశెట్టి... సిద్ధు పొలిశెట్టి అనే స్టాండప్‌ కమెడియన్‌ పాత్రలో, హీరోయిన్ అనుష్క... అన్విత రవళిశెట్టి అనే షెఫ్‌ పాత్రలోనూ నటించారు. ఈ చిత్రానికి రధన్‌ సంగీతం అందించారు. నీరవ్‌ షా ఛాయాగ్రహణం అందించారు.