రౌడీ స్టార్‌ సినిమాలో 'మమ్మీ' స్టార్‌?
విజయ్ దేవరకొండ ఈ ఏడాది ఫ్యామిలీ స్టార్‌ సినిమాతో ప్రేక్షకుల ముందుకు వచ్చి నిరాశ పరచిన విషయం తెల్సిందే.
By: Tupaki Desk | 4 Nov 2024 5:49 AM GMT
విజయ్ దేవరకొండ ఈ ఏడాది ఫ్యామిలీ స్టార్‌ సినిమాతో ప్రేక్షకుల ముందుకు వచ్చి నిరాశ పరచిన విషయం తెల్సిందే. ఆ సినిమా ఫలితంతో విజయ్ దేవరకొండ సినిమాల ఎంపిక విషయంలో మరింత జాగ్రత్తలు తీసుకుంటున్నారని తెలుస్తోంది. ప్రస్తుతం గౌతమ్ తిన్ననూరి దర్శకత్వంలో ఒక భారీ సినిమాను రౌడీ స్టార్‌ చేస్తున్నాడనే విషయం తెల్సిందే. ఇప్పటికే ఆ సినిమా షూటింగ్‌ పూర్తి కావాల్సి ఉన్నా కొన్ని కారణాల వల్ల సినిమా ఆలస్యం అయ్యింది. త్వరలోనే షూటింగ్‌ పూర్తి చేస్తామని మేకర్స్‌ ఇటీవల ప్రకటించారు. గౌతమ్ తిన్ననూరి దర్శకత్వంలోనే కాకుండా మరో రెండు మూడు సినిమాలకు సైతం విజయ్ దేవరకొండ ఓకే చెప్పాడు.
టాక్సీవాలా సినిమాతో విజయ్ దేవరకొండకు సక్సెస్‌ను అందించిన దర్శకుడు రాహుల్‌ సంకృత్యాన్‌ దర్శకత్వంలో మరో సినిమా రూపొందబోతుంది. గతంలోనే వీరి కాంబో మూవీని ప్రకటించినా మేకింగ్‌కు కాస్త సమయం తీసుకున్నారు. ఎట్టకేలకు సినిమా ప్రీ ప్రొడక్షన్ వర్క్‌ ప్రారంభం అయినట్లుగా తెలుస్తోంది. వచ్చే ఏడాదిలోనే సినిమాను ప్రారంభించి అదే ఏడాదిలో ప్రేక్షకుల ముందుకు వచ్చే విధంగా ప్లాన్‌ చేస్తున్నారు. విభిన్న చిత్రాల దర్శకుడిగా పేరు దక్కించుకున్న రాహుల్‌ సంకృత్యాన్‌ ఈసారి కూడా చాలా డిఫరెంట్‌ కాన్సెప్ట్‌ ను ఎంపిక చేసుకున్నారని, విజయ్ దేవరకొండ సైతం ఆ కాన్సెప్ట్‌ కి ఫిదా అయ్యారని సమాచారం అందుతోంది.
విజయ్ దేవరకొండతో రాహుల్‌ సంకృత్యాన్‌ రూపొందించబోతున్న సినిమాలో హాలీవుడ్‌ నటుడు ఆర్నాల్డ్‌ వోస్లూ కీలక పాత్రలో కనిపించే అవకాశాలు ఉన్నాయి. 'ది మమ్మీ', 'ది మమ్మీ రిటర్న్స్‌' సినిమాల్లో విలన్‌గా నటించి ప్రపంచ వ్యాప్తంగా గుర్తింపు దక్కించుకున్న ఆర్నాల్డ్‌ వోస్లూ ను తెలుగు సినిమాలో నటింపజేసేందుకు చర్చలు జరుగుతున్నాయట. ఈ దక్షిణాఫ్రికా నటుడు పాత్ర మెచ్చితే ఏ భాషలో నటించేందుకైనా రెడీ అంటాడని తెలుస్తోంది. కనుక దర్శకుడు రాహుల్‌ సంకృత్యాన్‌ ఆయన్ను ఒప్పించగలడా అనేది చూడాలి. కథలో బలమైన పాత్ర కనుకే ఆయనతో చేయించాలని రాహుల్‌ భావిస్తూ ఉంటాడని సమాచారం అందుతోంది.
విజయ్ దేవరకొండ 14వ సినిమాగా రాహుల్‌ సంకృత్యాన్‌ దర్శకత్వంలో రూపొందబోతుంది. ఒక భారీ పీరియాడికల్‌ వార్‌ డ్రామాగా ఈ సినిమా ఉండనుందట. చారిత్రాత్మక నేపథ్యంతో పాటు, విభిన్నమైన థ్రిల్లర్ ఎలిమెంట్స్ తో ఈ సినిమా కథ ఉంటుందని తెలుస్తోంది. విజయ్ దేవరకొండ కెరీర్ లో అత్యంత కీలకమైన సినిమాగా ఈ సినిమా నిలుస్తుందనే నమ్మకం వ్యక్తం అవుతోంది. నానితో రాహుల్‌ రూపొందించిన శ్యామ్‌ సింగరాయ్ కమర్షియల్‌గా ఓకే అనిపించింది. కానీ విమర్శకుల ప్రశంసలు దక్కించుకుని సూపర్‌ హిట్‌గా నిలిచింది అనడంలో సందేహం లేదు. అందుకే విజయ్ దేవరకొండతో రాహుల్‌ సంకృత్యాన్‌ సినిమా అనగానే అంచనాలు భారీగా పెరిగాయి. ఆ అంచనాలను అందుకోవడం కోసం రాహుల్‌ చాలా కష్టపడాల్సి ఉంది.
