రంగంలోకి రెహ‌మాన్ వార‌సురాలు!

మ్యూజిక్ లెజెండ్ ఏ.ఆర్ .రెహ‌మాన్ సంచ‌ల‌నాల గురించి చెప్పాల్సిన ప‌నిలేదు. రెహ‌మాన్ జ‌న‌రేష‌న్ మ్యూజిక్ డైరెక్ట‌ర్ల గురించి మాట్లాడాల్సి వ‌స్తే ఆయ‌న‌కు ముందు..త‌ర్వాత అని క‌చ్చితంగా చెప్పాల్సి ఉంటుంది. త‌న సంగీత ప్ర‌పంచంలో ఎంతో మంది శ్రోత‌ల్ని ఉర్రూత‌లూగించిన ఓ సంగీత శిఖరమాయన‌. సంగీతంలో ఆస్కార్ ని ప‌రిచ‌యం చేసిన ఘ‌న‌త ఆయ‌న సొంతం.

ద‌శాబ్ధాలుగా భార‌తీయ చిత్ర ప‌రిశ్ర‌మ‌కు రెహ‌మాన్ అందిస్తోన్న సేవ‌లు చిర‌స్మ‌ర‌ణీయం. అయితే కొంత కాలంగా రెహ‌మాన్ మార్క్ మిస్ అవుతుంద‌నే విమ‌ర్శలు కూడా ఉన్నాయి. వాటిని అధిగ‌మించి మ‌ళ్లీ గ‌త వైభ‌వం దిశ‌గా అడుగులు వేస్తున్నారు. ఇటీవ‌లే `ది గోట్ లైఫ్` సినిమాతో మ‌రోసారి త‌న మార్క్ చూపించే ప్ర‌య‌త్నం చేసారు. ఈ నేప‌థ్యంలో తాజాగా రెహమాన్ వార‌సురాలు తండ్రి వార‌స‌త్వాన్ని పుణికి పుచ్చుకుని సంగీత ప్ర‌పంచంలోకి అడుగు పెడుతుంది. ఆమె పేరు ఖ‌తీజా రెహ‌మాన్.

`మిన్మినీ` అనే సినిమాతో సంగీత ద‌ర్శ‌కురాలిగా ప‌రిచ‌య‌మ‌వుతుంది. అన్ని ప‌నులు పూర్తి చేసుకుని ఆగస్టు 9న విడుదల చేస్తున్నారు. దీంతో ఖ‌తీజా సంగీతం ఎలా ఉంటుంది? అన్న దానిపై స‌ర్వ‌త్రా ఆస‌క్తి నెల‌కొంది. ఈ చిత్రానికి హ‌లిత ష‌మీన్ అనే లేడీ ద‌ర్శ‌క‌త్వం వ‌హిస్తున్నారు. ఈసినిమాకి మ‌రో ప్ర‌త్యేక‌త కూడా ఉంది. మూవీని తొమ్మిదేళ్ల పాటు చిత్రీకరించడం విశేషం.

2015లో షూటింగ్ మొద‌లు పెట్టి 2024 కి పూర్తి చేసారు. ఈ సినిమాలో నటించిన బాల నటులే... ఆ తర్వాత పెద్ద వారిగా మార‌తారు. ఇది ఓ ర‌కంగా ప్ర‌యోగాత్మ‌క సినిమా అనే చెప్పాలి. ఇప్ప‌టికే ఇండస్ట్రీలో రెహ‌మాన్ మేన‌ల్లుడు జీవి. ప్ర‌కాష్ కుమార్ న‌టుడిగా, మ్యూజిక్ డైరెక్ట‌ర్ గా కొన‌సాగుతోన్న సంగ‌తి తెలిసిందే.