సైలెంట్ గా ఉండే ప్రభాస్ చుట్టే ఇంత గొడవనా..?

మార్కెట్ పరంగా ఇండియాలోనే నెంబర్ వన్ స్టార్ గా ప్రభాస్ కొనసాగుతున్న విషయం తెలిసిందే. వివాదాలకి దూరంగా ఉండే ప్రభాస్ ను ఒక హీరోగా దాదాపు అన్ని వర్గాల ఆడియెన్స్ ఇష్టపడతారు. చివరగా కల్కి 2898ఏడీ సినిమాతో ఏకంగా 1100 కోట్లకు పైగా కలెక్షన్స్ ని ప్రభాస్ సొంతం చేసుకున్నారు. ఈ సినిమా సక్సెస్ తో ఆయన ఇమేజ్ కూడా అమాంతం పెరిగిపోయింది. డార్లింగ్ ప్రభాస్ కి దేశవ్యాప్తంగా ఫ్యాన్ ఫాలోయింగ్ ఉంది.

అయితే వివాదాలకి దూరంగా ఉండే ప్రభాస్ చుట్టూనే ఇప్పుడు నార్త్ ఇండియా సౌత్ ఇండియా సినిమా గొడవ నడుస్తూ ఉంది. బాలీవుడ్ లో కొంతమంది స్టార్ యాక్టర్స్, టెక్నీషియన్స్ ప్రభాస్ ఇమేజ్ ని యాక్సెప్ట్ చేయలేరు. ఇలాంటివారు రెగ్యులర్ గా ప్రభాస్ లుక్, యాక్టింగ్ పైన విమర్శలు చేస్తూ ఉంటారు. ఏదో ఒక విధంగా ప్రభాస్ ఇమేజ్ ని డ్యామేజ్ చేసే ప్రయత్నం చేస్తూ ఉంటారు.

తాజాగా బాలీవుడ్ నటుడు అర్షద్ వార్షి కల్కి సినిమాలో ప్రభాస్ క్యారెక్టర్ జోకర్ లా ఉందంటూ విమర్శలు చేశారు. అమితాబ్ బచ్చన్ పర్ఫామెన్స్ పై ప్రశంసలు కురిపిస్తూ ప్రభాస్ యాక్టింగ్ పైన కూడా అర్షద్ వార్షి కామెంట్ చేశారు. ఆయన కామెంట్స్ పై తెలుగు ఇండస్ట్రీకి చెందిన నిర్మాత అభిషేక్ అగర్వాల్ స్పందించారు. ప్రభాస్ సక్సెస్ ని, ఇమేజ్ ని భరించలేని వారే ఇలాంటి విమర్శలు చేస్తారంటూ కౌంటర్ ఇచ్చారు.

అలాగే హీరో సుధీర్ బాబు కూడా అర్షద్ పైన విమర్శలు చేశారు. సిద్దు జొన్నలగడ్డ కూడా తాజాగా అర్షద్ కామెంట్స్ పై కౌంటర్ వేశారు. రీసెంట్ గా నాచురల్ స్టార్ నాని కూడా అర్షద్ వార్షి కామెంట్స్ కి కౌంటర్ ఇచ్చారు. ప్రభాస్ ని విమర్శించడం ద్వారా పబ్లిసిటీ పొందుతున్న అతన్ని లైమ్ లైట్ లోకి తీసుకురావడం కరెక్ట్ కాదని అన్నారు.

ఈ వ్యాఖ్యలు కొంతమంది బాలీవుడ్ సినిమా అభిమానులను హర్ట్ చేశాయి. దీంతో నాని స్థాయి గురించి సోషల్ మీడియాలో వారు కామెంట్ చేస్తున్నారు. నాని ఇమేజ్ తో పోల్చుకున్న కూడా అర్షద్ వార్షి స్థాయి చాలా చిన్నది అంటూ తెలుగు ఫ్యాన్స్ కౌంటర్ వేస్తున్నారు. తెలుగు సినిమా అభిమానులు సోషల్ మీడియాలో బాలీవుడ్ సినిమాలు, స్టార్స్ పై విమర్శలు చేస్తున్నారు. ప్రభాస్ విమర్శించే ముందు మీ స్థాయి ఏంటనేది తెలుసుకోవాలని కామెంట్ చేస్తున్నారు. ప్రభాస్ మొదటిరోజు ఓపెనింగ్ కలెక్షన్స్ అంత రేంజ్ కూడా అర్షద్ వార్షికి లేదని కామెంట్స్ చేస్తున్నారు.

దీనిపై బాలీవుడ్ సినిమా అభిమానులు కూడా రివర్స్ అటాక్ చేస్తూ ఉండడం గమనార్హం. గత కొన్నేళ్లుగా బాలీవుడ్ నుంచి ఎవరో ఒకరు ప్రభాస్ ను పాయింట్ అవుట్ చేస్తూ విమర్శలు చేస్తున్నారు. అయితే ప్రభాస్ మాత్రం ఎప్పుడు తనపై వస్తున్న కామెంట్స్ పై రియాక్ట్ అయ్యే ప్రయత్నం చేయలేదు. ఏదేమైనా తన ప్రమేయం లేకుండానే ప్రస్తుతం నార్త్ సౌత్ సినిమా గొడవల్లో ప్రభాస్ మెయిన్ ఫ్యాక్టర్ గా మారిపోయారు.