ట్రైలర్: అలరిస్తోన్న అవసరాల 'నూటొక్క జిల్లాల అందగాడు'..!

అవసరాల శ్రీనివాస్‌ - 'చి.ల‌.సౌ' ఫేమ్‌ రుహాని శ‌ర్మ హీరోహీరోయిన్లుగా నటించిన లేటెస్ట్ కామెడీ ఎంటర్టైనర్ ''నూటొక్క జిల్లాల అందగాడు''. రాచకొండ విద్యాసాగర్ దర్శకత్వం వహించిన ఈ చిత్రానికి శ్రీనివాస్‌ అవసరాల కథ అందించారు. ఇప్పటికే విడుదలైన ప్రచార చిత్రాల్లో హీరోని బట్టతలతో చూపించి ఈ సినిమాపై ఆసక్తిని కలిగించారు. ఈ చిత్రాన్ని సెప్టెంబర్ 3న థియేట్రికల్ రిలీజ్ చేస్తున్నారు. ఈ నేపథ్యంలో తాజాగా ట్రైలర్ ను మెగా ప్రిన్స్ వరుణ్ తేజ్ విడుదల చేసి చిత్ర బృందానికి విషెస్ అందజేశారు.

బట్టతల ఉన్న హీరో విగ్ సహాయంతో దాన్ని దాచుకోవడానికి చేసిన ప్రయత్నాలను ఈ ట్రైలర్ లో ఫన్నీగా చూపించారు. ఇందులో గొత్తి సూర్య నారాయణ అనే బట్టతల ఉన్న యువకుడిగా శ్రీనివాస్‌ అవసరాల కనిపించనున్నారు. హీరోయిన్ ప్రేమలో పడిన తర్వాత తన బట్టతల విషయాన్ని ఆమెతో చెప్పలేక.. దాన్ని దాచలేక ఎలాంటి ఇబ్బందుల్లో పడతాడు అనేది 'నూటొక్క జిల్లాల అందగాడు' చూపిస్తోంది. కాస్తంత ఎమోషన్ కూడా ఉన్నట్టు హింట్ ఇచ్చారు.

''నూటొక్క జిల్లాల అందగాడు'' ట్రైలర్ చూస్తుంటే హిందీలో సూపర్ హిట్ అయిన 'బాలా' సినిమా ఛాయలు ఉన్నట్లు అనిపిస్తుంది. రెండు చిత్రాలకు పోలికలు ఉన్నాయో లేదో తెలియాలంటే సినిమా విడుదల అయ్యే వరకు ఆగాల్సిందే. మొత్తం మీద ఈ మూవీ కావాల్సినంత నవ్వులు పంచబోతోందని ట్రైలర్ చూస్తే అర్థం అవుతోంది.

దిల్ రాజు - క్రిష్ జాగర్లమూడి సమర్పణలో శ్రీవెంక‌టేశ్వ‌ర క్రియేష‌న్స్‌ - ఫ‌స్ట్ ఫ్రేమ్ ఎంట‌ర్‌టైన్‌మెంట్స్ బ్యానర్స్ పై శిరీష్ - వై.రాజీవ్ రెడ్డి - జె.సాయిబాబు సంయుక్తంగా ఈ చిత్రాన్ని నిర్మిస్తున్నారు. శక్తికాంత్ కార్తీక్ ఈ మూవీకి మ్యూజిక్ సమకూర్చారు. రామ్ సినిమాటోగ్రఫీ అందించగా.. కిరణ్ గంటి ఎడిటింగ్ వర్క్ చేశారు.