తమన్నా '11త్ అవ‌ర్' వెబ్ సిరీస్ టీజర్..!

కరోనా లాక్ డౌన్ సమయంలో ఓటీటీల సందడి ఎక్కువ అవడంతో స్టార్ హీరోహీరోయిన్లు సైతం వెబ్ సిరీస్ లలో నటించడానికి ముందుకొచ్చారు. స్టార్ హీరోయిన్ మిల్కీ బ్యూటీ తమన్నా భాటియా కూడా డిస్నీ ప్లస్ హాట్ స్టార్ కోసం 'నవంబర్ స్టోరీస్' అనే సిరీస్ లో నటించింది. ఈ క్రమంలో తెలుగు ఓటీటీ ఫ్లాట్ ఫార్మ్ 'ఆహా' కోసం ''11త్ అవ‌ర్'' అనే వెబ్ సిరీస్ చేసింది. నేషనల్ అవార్డ్ విన్నింగ్ డైరెక్టర్ ప్రవీణ్ సత్తారు ఈ సిరీస్ ని రూపొందించాడు. తాజాగా '11త్ అవ‌ర్' టీజర్ ను యూనిట్ సభ్యులు విడుదల చేశారు.

తమన్నా ఈ సిరీస్ లో కార్పొరేట్ కంపెనీని ని నడిపే అరాత్రికా రెడ్డి అనే అమ్మాయిగా కనిపిస్తోంది. అయితే కుటుంబ సభ్యులు - స్నేహితులు - శత్రువులు ఆమె ఆ కంపెనీని నిర్వహించలేదనే భావనతో ఉన్నట్లు టీజర్ చూస్తే అర్థం అవుతోంది. పురుషాధిక్యత ఉన్న రంగంలోకి దిగిన యువతి.. ఆ పోటీని శత్రువులను తట్టుకొని ఎలా పోరాడి నిలబడింది అనేది ఈ కథ. 'చక్రవ్యూహంలో చిక్కుకున్నప్పుడు దారి వెతికితే దొరకదు.. క్రియేట్ చేయాల్సి వస్తుంది' అని డైలాగ్ '11త్ అవ‌ర్' నేపథ్యాన్ని తెలియజేస్తోంది. ఈ కార్పొరేట్ డ్రామాలో తమన్నా రిజర్వ్డ్ గా ఉండే పాత్రలో అలరించనుందని తెలుస్తోంది.

ఈ ఒరిజినల్ సిరీస్ లో అరుణ్ ఆదిత్ - వంశీ కృష్ణ - రోషిణి ప్రకాష్ - జయప్రకాష్ - శత్రు - మధుసూదన్ రావు - పవిత్ర లోకేష్ - అనిరుధ్ బాలాజీ - శ్రీకాంత్ అయ్యంగార్ - వినయ్ - ప్రియా బెనర్జీ తదితరులు ఇతర పాత్రలు పోషించారు. ప్రదీప్ ఉప్పలపాటి ప్రొడ్యూసర్ గా వ్యవహరించారు. ''11త్ అవ‌ర్'' సిరీస్ 'ఆహా' యాప్ లో ఏప్రిల్ 9 నుంచి స్ట్రీమింగ్ కానుంది.