1 నేనొక్కడినే ట్రైలర్ ఇలా ఉండుంటేనా..

మనం ఎలాంటి సినిమా చూడబోతున్నామన్న సంకేతాలు ఇస్తుంది ట్రైలర్. దీని ద్వారా దర్శకుడు ప్రేక్షకులకు సరైన సంకేతాలివ్వాలి. ప్రేక్షకులకు సినిమాలో ఏముంటుందో సరిగ్గా చెప్పే ప్రయత్నం చేయాలి. వాళ్లకు విషయం సరిగా కన్వే చేయలేకపోతే.. అంతే సంగతులు. వాళ్లు ఊహించుకున్నదానికి భిన్నంగా సినిమా ఉంటే.. నిరాశ చెందుతారు. ఆ క్రమంలో టాక్ తేడా కొట్టేస్తుంది. దీని వల్ల సినిమా ఫలితమే మారిపోతూ ఉంటుంది. ఇందుకు ఉదాహరణ.. 1 నేనొక్కడినే.

‘1 నేనొక్కడినే’ ప్రోమోలన్నీ కూడా ఇదొక స్టైలిష్ యాక్షన్ ఎంటర్టైనర్ అనే ఫీలింగ్ కలిగించాయి. ఇదో సైకలాజికల్ మిస్టరీ థ్రిల్లర్ అనే భావన కలిగించలేదు. సినిమా ప్రేక్షకుల అంచనాలకు పూర్తి భిన్నంగా కనిపించింది. ప్రేక్షకులు ఏదో ఊహించుకుని వెళ్లి.. అక్కడ ఇంకేదో కనిపించేసరికి కన్ఫ్యూజ్ అయ్యారు. దీంతో టాక్ తేడా కొట్టింది.

తర్వాత తర్వాత ‘1 నేనొక్కడినే’ గొప్ప సినిమా అని.. హాలీవుడ్ స్థాయి థ్రిల్లర్ అని అందరూ ప్రశంసించినా ఫలితమేముంది? సినిమా మాత్రం పెద్ద డిజాస్టర్‌గా మిగిలింది. ఐతే ‘1 నేనొక్కడినే’ సినిమాకు సరైన ట్రైలర్ కట్ చేసి ఉంటే ఎలా ఉంటుందనే ఆలోచనలోంచి ఇప్పుడు నెటిజన్లు మంచి ప్రయత్నమే చేశారు. ‘ఫాలౌట్’ స్టయిల్లో ఈ సినిమా ట్రైలర్ కట్ చేసి.. సోషల్ మీడియాలోకి వదిలారు కొందరు జనాలు. అది చూసి ఇప్పుడు జనాలు షాకైపోతున్నారు. ‘1 నేనొక్కడినే’ ఎలాంటి సినిమా అనే విషయాన్ని చాలా బాగా కన్వే చేసిందీ చిత్రం. సినిమాలో హైలైట్‌ గా నిలిచిన విజువల్స్ అన్నింటికీ ఇందులో చోటు కల్పించారు. ఈ ట్రైలర్ చూస్తే ఇదో హాలీవుడ్ సినిమా అనే ఫీలింగ్ కలుగుతోంది. సుకుమార్ టీం ఇలాగే కనుక ట్రైలర్ కట్ చేసి ఉంటే సినిమా ఫలితమే మరోలా ఉండేదేమో అన్న ఫీలింగ్ కలుగుతోంది.