2 కోట్ల ఇంట్లో ఎన్టీవోడు

జూనియర్ ఎన్టీఆర్ కెరీర్లోనే అత్యంత ప్రతిష్టాత్మకంగా తెరకెక్కుతున్న సినిమా ‘జనతా గ్యారేజ్’. మిర్చి.. శ్రీమంతుడు లాంటి బ్లాక్ బస్టర్లు ఇచ్చిన దర్శకుడు.. ‘శ్రీమంతుడు’తో టాలీవుడ్లోకి గ్రాండ్ ఎంట్రీ ఇచ్చిన నిర్మాతలు.. మోహన్ లాల్-సమంత-నిత్యామీనన్ లాంటి క్రేజీ ఆర్టిస్టులు.. దేవిశ్రీ ప్రసాద్ లాంటి టాప్ మ్యూజిక్ డైరెక్టర్.. ఇలా మాంచి కాంబినేషన్ కుదిరింది ఈ సినిమాకు. అందుకే సినిమా సెట్స్ మీదికి వెళ్లకముందే దీనికి అదిరిపోయే బిజినెస్ ఆఫర్లు వచ్చాయి. ఎన్టీఆర్ గత రెండు సినిమాలూ విజయవంతం కావడం కూడా ‘జనతా గ్యారేజ్’ మీద అంచనాల్ని మరింత పెంచాయి. ఈ అంచనాల్ని అందుకునే విషయంలో ఏమాత్రం రాజీ పడకుండా సినిమాను తెరకెక్కిస్తున్నాడట డైరెక్టర్ కొరటాల శివ.

ఎన్టీఆర్ కెరీర్లోనే హైయెస్ట్ బడ్జెట్ తో తెరకెక్కుతున్న ఈ సినిమా కోసం ఇటీవలే రూ.2 కోట్ల ఖర్చుతో మండువా ఇంటి సెట్ వేశారట. ఇది టాలీవుడ్లో అత్యంత రిచ్ ఇంటి సెట్టింగ్స్ లో ఒకటని చెబుతున్నారు. ఆర్ట్ డైరెక్టర్ బృందం చాలా రోజులు శ్రమించి.. ఈ భారీ ఇంటి సెట్ నిర్మించారట. ఈ ఇంట్లో సినిమాకు సంబంధించిన కీలక పాత్రధారులపై ముఖ్యమైన సన్నివేశాలు చిత్రీకరిస్తున్నట్లు తెలిసింది. సినిమాకు ఈ ఇంటి సెట్ ప్రత్యేక ఆకర్షణగా నిలుస్తుందని చెబుతున్నారు. ఇంతకుముందు ఈ సినిమా కోసం భారీ గ్యారేజ్ సెట్టింగ్ కూడా వేశారు. అందులోనూ చాలా సన్నివేశాలు చిత్రీకరించారు. ఇప్పుడు మండువా ఇంట్లో షూటింగ్ జరుగుతోంది. ఇంకో రెండు నెలల్లో టాకీ పార్ట్ మొత్తం పూర్తయిపోతుందని సమాచారం. ఆగస్టు 12న ఈ చిత్రం ప్రేక్షకుల ముందుకు రానున్న సంగతి తెలిసిందే.