ఫిజిక‌ల్ మేకోవ‌ర్ కోసం 2 నెల‌లు?

ఇది రూమర్ కాకుండా నిజ‌మే అయితే జ‌న‌సేనాని ప‌వ‌న్ క‌ల్యాణ్ వ‌రుస‌గా సినిమాల‌తో బిజీ అవుతున్న‌ట్టే. 2020-21 సీజ‌న్ లో ప‌వ‌న్ నుంచి వ‌రుస సినిమాల ట్రీట్ ఉంటుంద‌నే అంచ‌నా వేయొచ్చు. ఓవైపు పింక్ రీమేక్ అంటూనే మ‌రోవైపు ఓ యువ ద‌ర్శ‌కుడికి గ్రీన్ సిగ్న‌ల్ ఇచ్చారు అంటూ ప‌వ‌న్ పై ర‌క‌ర‌కాలుగా ప్ర‌చారం అవుతోంది.

జ‌న‌సేన అధినేత‌.. ప‌వ‌ర్‌ స్టార్ ప‌వ‌న్ క‌ల్యాణ్ మ‌ళ్లీ కెమెరా ముందుకు వ‌స్తున్నార‌న్న ప్ర‌చారం వేడెక్కిస్తున్న సంగ‌తి తెలిసిందే. ఆంధ్ర‌ప్ర‌దేశ్ క్రియాశీల రాజ‌కీయాల్లో త‌న దైన పాత్ర పోషించాల‌ని జ‌న‌సేన‌ పార్టీని స్థాపించిన ప‌వ‌న్ క‌ల్యాణ్ గ‌త కొంత కాలంగా సినిమాల‌కు బ్రేకిచ్చారు. ప్ర‌స్తుతం బాలీవుడ్ హిట్ ఫిల్మ్ `పింక్‌` రీమేక్‌లో న‌టిస్తున్నారని వార్త‌లొచ్చాయి. ఈ చిత్రాన్ని బోనీక‌పూర్ తో క‌లిసి దిల్ రాజు నిర్మిస్తున్నారు. శ్రీ‌రామ్ వేణు ద‌ర్శ‌క‌త్వం వ‌హిస్తున్నారు. జ‌న‌వ‌రి నుంచి రెగ్యుల‌ర్ షూటింగ్ ప్రారంభం కానుంది. ఇప్ప‌టికే ప్రీ ప్రొడ‌క్ష‌న్ వ‌ర్క్ ని మొద‌లుపెట్టారు.

అయితే పింక్ కోసం ప్రీప్రిప‌రేష‌న్ కి ప‌వ‌న్ ఎక్కువ స‌మ‌యం తీసుకోనున్నార‌ని తెలుస్తోంది. త‌న ఫ్యాన్స్ ఇష్ట‌ప‌డే స్థాయిలో క‌నిపించ‌డం కోసం ప‌వ‌న్ ఫిజిక‌ల్ మేకోవ‌ర్ కోసం సిద్ధ‌మ‌వుతున్నార‌ట‌. దాంతో జ‌న‌వ‌రిలో మొద‌లుకావాల్సిన ఈ రీమేక్ ఫిబ్ర‌వ‌రి లేదా మార్చిలో సెట్స్ పైకి వెళ్లే అవ‌కాశం వుంద‌ని తెలుస్తోంది. ఇదిలా వుంటే ప‌వ‌న్ మ‌రో ద‌ర్శ‌కుడికి గ్రీన్ సిగ్న‌ల్ ఇచ్చిన‌ట్టు కొత్త రూమ‌ర్ చ‌క్క‌ర్లు కొడుతోంది. `జెర్సీ` ఫేమ్ గౌత‌మ్ తిన్న‌నూరితో సినిమా చేయ‌బోతున్నార‌ని వార్త‌లు వినిపిస్తున్నాయి. ప్ర‌స్తుతం గౌత‌మ్ తిన్న‌నూరి బాలీవుడ్ లో షాహిద్ క‌పూర్ హీరోగా `జెర్సీ` చిత్రాన్ని రీమేక్ చేస్తున్నారు. అత‌నితో ప‌వ‌న్ రెగ్యుల‌ర్ గా ట‌చ్‌లో వుంటున్నార‌ట‌. వీరిద్ద‌రి క‌ల‌యిక‌లో రానున్న సినిమాకు మాట‌ల మాంత్రికుడు త్రివిక్ర‌మ్ మాట‌లు అందించ‌నుండ‌గా.. అనిరుధ్ సంగీతం అందించ‌నున్నార‌ని వినిపిస్తోంది.