టీజ‌ర్ టాక్‌: ఇది ముద్దుల ఉత్స‌వమే

తెలుగు సినిమాలో ఒక ముద్దు స‌న్నివేశం ఉందంటే చాలు. దాని గురించి క‌థ‌లు క‌థ‌లుగా చెప్పుకొనేవాళ్లు. కానీ అర్జున్‌ రెడ్డి మాత్రం ముద్దుల లెక్క‌లు మార్చేశాడు. వాటికి హ‌ద్దులే లేకుండా చెరిపేశాడు. మొన్న విడుద‌లైన 'ఆర్.ఎక్స్‌.100' తో ఆ పరంప‌ర కొన‌సాగింది. హాట్ హాట్ లిప్పు లాకులేసుకొని ప్రేక్ష‌కుల ముందుకొచ్చిన ఈ రెండు సినిమాలూ సూప‌ర్ స‌క్సెస్ అయ్యాయి. దాంతో తెలుగు చిత్ర‌సీమ‌కి ముద్దులు బాగా క‌లిసొచ్చిన‌ట్టైంది. ఇక‌పై రాబోయే యూత్ కంటెంట్ బేస్డ్ సినిమాల‌న్నీ కూడా అదే బాట ప‌ట్టేలా క‌నిపిస్తోంది వాతావ‌ర‌ణం. తాజాగా మ‌రో చిత్రం అదే త‌ర‌హాలో రూపుదిద్దుకొంటోంది.

అది... '24 కిస్సెస్‌' పేరులోనే బోలెడ‌న్ని ముద్దులున్న ఈ సినిమా టీజ‌ర్ ఇదివ‌ర‌కే విడుద‌లైంది. అందులో ఒక‌ట్రెండు కిస్సులు మాత్ర‌మే. కానీ దానికి ఎక్స్‌ టెన్ష‌న్‌ గా మ‌రో టీజ‌ర్‌ ని విడుద‌ల చేశారు. అందులో బోలెడ‌న్ని ఘాటు ముద్దులున్నాయి. నీకో సగం.. నాకో స‌గం ఈ ఉత్స‌వం అంటూ క్యాప్ష‌న్ పెట్టారు ఈ సినిమాకి. స‌గం స‌గం అంటే ఏంట‌నేది అర్థం కాలేదు కానీ.. ఉత్స‌వం అంటే ఇది ముద్దులకి సంబంధించిన ఉత్స‌వమే అనేది మాత్రం క్లారిటీగా అర్థ‌మ‌వుతోంది. మ‌రో ఆర్.ఎక్స్‌.100 వ‌స్తోందంటూ టీజ‌ర్‌ ని చూసిన‌వాళ్లంతా మాట్లాడుకోవ‌డం మొద‌లుపెట్టారు. అరుణ్ అదిత్‌ - హెబ్బా ప‌టేల్ జంట‌గా న‌టిస్తున్న ఈ సినిమాని అయోధ్య‌కుమార్ కృష్ణంశెట్టి తెర‌కెక్కిస్తున్నారు. ఇదివ‌ర‌కు ఆయ‌న మిణుగురులు అనే ఓ మంచి సినిమాని తీశాడు. ఈసారి మాత్రం దానికి పూర్తిభిన్న‌మైన సినిమాని తీస్తున్నాడు.