11 వీడియోలు 3 కోట్లు - ఇది వర్మ లెక్క

ఇంకో పది రోజుల్లో లక్ష్మీస్ ఎన్టీఆర్ విడుదల కానున్న నేపథ్యంలో వర్మ స్పీడ్ పెంచుతున్నాడు. ఇప్పటికే కేసుల హడావిడి మొదలైపోయింది. వీటిని ఎలా ఎదురుకోవాలో నాకు ముందే తెలుసని వర్మ చెప్పేశాడు కాబట్టి ఏదో అనూహ్యమైన సంఘటన జరిగితే తప్ప విడుదల వాయిదా పడటం సాధ్యం కాదు. ఇదిలా ఉండగా వర్మ మరో కొత్త లెక్కతో వచ్చాడు. అదే మూడు కోట్ల లెక్క. డిటైల్డ్ గా చూస్తే మీకే అర్థమవుతుంది.

లక్ష్మీస్ ఎన్టీఆర్ షూటింగ్ ప్రారంభించినప్పటి నుంచి వర్మ ఇప్పటిదాకా దానికి సంబంధించి 11 వీడియోలు విడుదల చేసాడు. ఇందులో ట్రైలర్లు లిరికల్ వీడియో సాంగ్స్ తెరవెనుక కథలు ఓపెన్ ఛాలెంజులు ఇలా అన్ని ఉన్నాయి. వీటికి ఎన్ని వ్యూస్ వచ్చాయని లెక్క కట్టిన వర్మ ఫైనల్ 3 కోట్ల ఫిగర్ ని తేల్చేశాడు. ఇవన్నీ వచ్చాయి బాగానే ఉంది కానీ అసలైన కంటెంట్ విషయంలో వర్మ ఎంతవరకు అంచనాలు నిలబెట్టుకుంటాడనే అనుమానం జనంలో లేకపోలేదు.

నిజమైన హిట్టు కొట్టి సంవత్సరాలు దాటిపోయింది. ఇప్పుడంటే ట్రైలర్ల పుణ్యమా అని ఇందులో ఏదో విషయం ఉందనే నమ్మకం కలిగింది కానీ ఇది ఎన్టీఆర్ కథ కాకపోయి ఉంటే అసలు ఎవరు పట్టించుకునే వాళ్ళు కూడా కాదు. పక్కా నాస్తికుడైన వర్మ ఇలా అంకెల గారడీని చూపించి నాకు అన్నగారి దీవెనలు ఉన్నాయి ప్రేక్షకులు నా వైపే ఉన్నారు అని చెప్పుకోవడంలో ఆశ్చర్యం లేదు కానీ మార్చ్ 22న వచ్చే సినిమా ఫలితం మీదే వర్మ భవిష్యత్తు ఆధారపడి ఉందన్న మాటలో నిజం లేకపోలేదు. ఇది తేలేలోపు ఆ మూడు కోట్ల లెక్కేంటో మీరు ఇక్కడ ఇచ్చిన పిక్ లో చూసి డిసైడ్ చేయండి