మెగాస్టార్ ఇండస్ట్రీ హిట్టుకు 33ఏళ్లు..!

టాలీవుడ్ మెగాస్టార్ చిరంజీవి నటించిన ఒక్కో రికార్డు బ్రేకింగ్ మూవీ రోజుకో వార్తల్లో నిలుస్తున్నాయి. టాలీవుడ్ ఇండస్ట్రీలో ఫస్ట్ టైం బ్రేక్ డాన్స్ ప్రవేశపెట్టిన ఘనత చిరుకే దక్కింది. అయితే మెగాస్టార్ అంటే మాంచి మాస్ క్లాస్ యాక్షన్ మాత్రమే కాదు ఇండస్ట్రీ హిట్టు కొట్టే డాన్స్ మూవ్స్ హావభావాలు కూడా ఆయనలో పుష్కలంగా ఉన్నాయని చాలా సినిమాలలో చాలామంది స్టార్ డైరెక్టర్స్ ప్రూవ్ చేశారు. కానీ ఒక్కో సినిమా ఒక్కో రికార్డు నెలకొల్పాయి. తాజాగా మెగాస్టార్ నటించిన 'యముడికి మొగుడు' సినిమా సోషల్ మీడియాలో, ఇండస్ట్రీలో హాట్ టాపిక్ గా మారింది. ఎందుకంటే ఈ సినిమా విడుదలై నేటికీ 33సంవత్సరాలు పూర్తవుతుంది. అప్పట్లోనే ఇండస్ట్రీ హిట్ గా నిలిచిన ఈ సినిమాలో మెగాస్టార్ కాళీ, బాలు అనే డ్యూయెల్ రోల్స్ పోషించాడు.

మెగాస్టార్ సరసన అప్పటి స్టార్ హీరోయిన్స్ విజయశాంతి, రాధా అలరించారు. స్టార్ డైరెక్టర్ రవిరాజా పినిశెట్టి దర్శకత్వంలో తెరకెక్కిన ఈ సినిమాకు స్టార్ రైటర్ సత్యానంద్ కథతో పాటు మాటలు కూడా అందించడం విశేషం. ఈ ఇండస్ట్రీ హిట్టు సినిమాను జీవీ నారాయణరావు, హరిప్రసాద్ లతో పాటు యాక్టర్ సుధాకర్ కూడా నిర్మాణంలో భాగస్వామ్యం కావడం జరిగింది. 1988 ఏప్రిల్ 29న విడుదలైన యముడికి మొగుడు మూవీ ఆ ఏడాది హైయెస్ట్ కలెక్షన్స్ రాబట్టిన సినిమాల్లో ఒకటిగా నిలిచింది. ఈ సినిమాలో యముడు పాత్రలో కైకాల సత్యనారాయణ అద్భుతంగా అలరించారు. అప్పట్లో 85లక్షల బడ్జెట్ తో తెరకెక్కిన ఈ సినిమా దాదాపు 5కోట్లు వసూల్ చేసిందని సమాచారం. ఈ సినిమాకు సంగీతద్వయం రాజ్ - కోటి అదిరిపోయే సాంగ్స్ అందించారు. తాజాగా ఈ సినిమా విడుదలై 33ఏళ్లు పూర్తయిన సందర్బంగా మరోసారి మెగాఫ్యాన్స్ ఈ మెగామూవీని గుర్తు చేసుకుంటున్నారు.