సుశాంత్ సింగ్ కుటుంబంలో మరో విషాదం..

దివంగత బాలీవుడ్ నటుడు సుశాంత్ సింగ్ కుటుంబంలో మరో తీరని విషాదం చోటుచేసుకుంది. ఘోర రోడ్డు ప్రమాదంలో ఆరుగురు మృతిచెందారు. వారంతా సుశాంత్ సింగ్ బంధువులుగా తెలుస్తోంది.

బీహార్ లోని లఖిసరాయ్ లో ఈ విషాద ఘటన చోటుచేసుకుంది. గ్యాస్ సిలిండర్ల ట్రక్కు సుమోను ఢీకొన్న ఘటనలో ఓకే కుటుంబానికి చెందిన ఆరుగురు ప్రాణాలు కోల్పోయారు. తీవ్రంగా గాయపడిన మరో నలుగురిని అక్కడి వారు ఆస్పత్రికి తరలించారు. వీరంతా సుశాంత్ సింగ్, బీహార్ మంత్రి నీరజ్ సింగ్ బబ్లూ బంధువులుగా అధికారులు గుర్తించారు.

సుశాంత్ సింగ్ బంధువు, హర్యానా ఏడీజీ ఓం ప్రకాష్ సింగ్ సోదరి గీతాసింగ్ సోమవారం పట్నాలో అనారోగ్యంతో మృతిచెందారు. భర్త లాల్ జీత్ సింగ్ సహా మరో తొమ్మిది మంది బంధువులు ఆమె దహన సంస్కారాల అనంతరం పట్నా నుంచి ఓ సుమోలో తిరుగు ప్రయాణమయ్యారు.

ఈ క్రమంలోనే ఈ ఘోర ప్రమాదం చోటుచేసుకుంది. సుమో డ్రైవర్ నిద్రమత్తులో ఉండడమే ప్రమాదానికి కారణమని స్థానికులు పేర్కొంటున్నారు. కేసు నమోదుచేసిన పోలీసులు ట్రక్కు డ్రైవర్ ను అదుపులోకి తీసుకున్నారు.