'7 డేస్ 6 నైట్స్' ట్రైలర్: రెండు జంటల మధ్య సాగే రొమాంటిక్ అండ్ క్రేజీ ఫన్ రైడ్..!

టాలీవుడ్ సీనియర్ ప్రొడ్యూసర్ ఎంఎస్ రాజు.. ఇప్పుడు డైరెక్టర్ గా తనను తాను సరికొత్తగా ఆవిష్కరించుకునే పనిలో ఉన్నారు. ఇందులో భాగంగా నేటితరం యువతీ యువకుల ఆలోచనలకు అద్దం పట్టే కథలను తెర పైకి తీసుకొచ్చే ప్రయత్నం చేస్తున్నారు. గతేడాది 'డర్టీ హరి' సినిమాతో సక్సెస్ అందుకున్న ఎమ్మెస్ రాజు.. ఇప్పుడు ''7 డేస్ 6 నైట్స్'' అనే చిత్రంతో ప్రేక్షకుల ముందుకు వస్తున్నారు.

న్యూ ఏజ్ యూత్ ఫుల్ రొమాంటిక్ ఎంటర్టైనర్ గా '7 డేస్ 6 నైట్స్' సినిమా తెరకెక్కింది. ఇందులో ఎంఎస్ రాజు తనయుడు సుమంత్ అశ్విన్ మరియు రోహన్ హీరోలుగా నటించగా.. మెహర్ చావల్ - కృతికా శెట్టి హీరోయిన్లుగా కనిపించనున్నారు. ఎప్పుడో ఫైనల్ కాఫీ రెడీ అయిపోయిన ఈ చిత్రాన్ని ఎట్టకేలకు థియేటర్లలోకి తీసుకొస్తున్నారు. ఈ నేపథ్యంలో మేకర్స్ ప్రమోషన్స్ చేస్తున్నారు.

ఇప్పటికే విడుదలైన ప్రచార చిత్రాలు - టీజర్ - ట్రైలర్ యూత్ ఆడియన్స్ ను విశేషంగా ఆకట్టుకున్నాయి. రిలీజ్ డేట్ దగ్గర పడుతుండటంతో తాజాగా కొత్త ట్రైలర్ ను లాంచ్ చేశారు. బ్యాచిలర్ ట్రిప్ కోసం గోవా వెళ్లిన సుమంత్ అశ్విన్ - రోహన్ లకు మెహర్ - కృతికాలు పరిచయం అవుతారు. ట్రైలర్ లో స్టోరీ ఏంటనేది రివీల్ చేయలేదు కానీ.. ఈ రెండు జంటల మధ్య వారం రోజుల్లో జరిగే జర్నీని '7 డేస్ 6 నైట్స్' సినిమాలో చూపించబోతున్నట్లు తెలుస్తోంది.

హీరోహీరోయిన్ల క్రేజీ క్యారెక్టరైజేషన్లు మరియు అందమైన లొకేషన్లు ఈ ట్రైలర్ లో ఆకర్షణీయంగా ఉన్నాయి. 'డర్టీ హరి' తరహాలోనే ఇందులో యూత్ ని అట్రాక్టు చేసే సీన్స్ పుష్కలంగా ఉన్నాయని అర్థం అవుతుంది. విజువల్స్ మరియు బ్యాగ్రౌండ్ స్కోర్ బాగున్నాయి.

ఇందులో సుష్మ - రిషికా బాలి కీలక పాత్రలు పోషిస్తుండగా.. 'మిడిల్ క్లాస్ మెలోడీస్' ఫేమ్ గోపరాజు రమణ అతిథి పాత్రలో కనిపించనున్నారు. సమర్థ్ గొల్లపూడి ఈ సినిమాకు సంగీతం సమకూర్చారు. నాని చమిడిశెట్టి సినిమాటోగ్రఫీ అందించగా.. జునైద్ సిద్ధిఖీ ఎడిటింగ్ వర్క్ చేశారు.

సుమంత్ ఆర్ట్ ప్రొడక్షన్ సమర్పణలో వైల్డ్ హనీ ప్రొడక్షన్స్ బ్యానర్ లో సుమంత్ అశ్విన్ మరియు ఎస్. రజనీకాంత్ సంయుక్తంగా ఈ చిత్రాన్ని నిర్మించారు. వింటేజ్ పిక్చర్స్ & ఏబీజీ క్రియేషన్స్ సంస్థలు నిర్మాణ భాగస్వాములుగా ఉన్నాయి. జూన్ 24న '7 డేస్ 6 నైట్స్' సినిమాని థియేటర్లలో విడుదల చేయనున్నారు.