‘అ..ఆ’ టీమ్ ఎందుకు వెయిటింగంటే..

మేలో వచ్చేస్తున్నాం అంటూ పోస్టర్ల మీద ఘనంగా ప్రకటించేశారు ‘అ..ఆ’ మేకర్స్. కానీ మే నెల సగం అయిపోవస్తోంది. ఇప్పటిదాకా రిలీజ్ డేటే ప్రకటించలేదు. 20వ తారీఖు ‘బ్రహ్మోత్సవం’ ఫిక్సయిపోవడంతో ‘అ..ఆ’ ఇక మే నెలలో ఛాన్సే లేదని తేలిపోయింది. ఒకవేళ ‘బ్రహ్మోత్సవం’కు నెగెటివ్ టాక్ వస్తే ఆ తర్వాతి వారమేమైనా రిలీజ్ చేసేద్దామని చూసేస్తున్నారో ఏంటో కానీ.. త్రివిక్రమ్ కానీ.. రాధాకృష్ణ కానీ రిలీజ్ డేట్ ఊసే ఎత్తట్లేదు.

అసలు ఆడియో విడుదలయ్యాక రెండు మూడు రోజులు తప్పిస్తే వార్తల్లోనే లేదు ‘అ..ఆ’. ప్రమోషన్ల గురించి కూడా ఏం పట్టించుకోకపోవడం చూస్తుంటే మే నెలలో సినిమాను రిలీజ్ చేసే ఛాన్సే లేదని అర్థమైపోతోంది. ఫస్ట్ కాపీ కూడా రెడీ చేసుకుని ఇలా వెయిటింగులో పెట్టడమే చిత్రమైన విషయం. ఐతే ఎప్పుడు రిలీజైనా స్యూర్ షాట్ సక్సెస్ అని కాన్ఫిడెంటుగా ఉన్న రాధాకృష్ణ అస్సలు కంగారు పడట్లేదట.

జూన్ 3న రావాల్సిన రజినీకాంత్ సినిమా ‘కబాలి’ వాయిదా పడ్డ నేపథ్యంలో ఆ డేటునే ‘అ..ఆ’కు ఫిక్స్ చేసేద్దామని చూస్తున్నారట. ఐతే ‘బ్రహ్మోత్సవం’ రిలీజ్ రోజు రిజల్ట్ ఏంటో చూశాక అదే రోజు ‘అ..ఆ’ విడుదల తేదీని కన్ఫమ్ చేస్తారట. ఐతే ఈ లోపు ఇంకెవరైనా జూన్ 3 మీద కర్చీఫ్ వేసేస్తారేమో అన్న సందేహాలు కూడా లేకపోలేదు. మరి ‘అ..ఆ’ టీమ్ ఏం చేస్తుందో చూడాలి.