అ..ఆ.. డేట్ తెలిసిపోయింది!!

నితిన్, సమంతలు జంటగా మాటల మాంత్రికుడు త్రివిక్రమ్ శ్రీనివాస్ రూపొందించిన చిత్రం అ..ఆ.. అనసూయా రామలింగం వర్సెస్ ఆనంద్ విహారి అంటూ ఈ చిత్రానికో ట్యాగ్ లైన్ కూడా ఉంది. ఇప్పుడీ మూవీ విడుదల కోసం ఎదురుచూస్తోంది. ఫిబ్రవరిలోనే విడుదల కావాల్సిన ఈ మూవీ.. అప్పట్లో నిర్మాణం ఆలస్యం కావడంతో లేట్ అయ్యింది. ఇప్పుడు అన్నీ కంప్లీట్ చేసుకుని ఫస్ట్ కాపీ చేతిలో పట్టుకున్నా.. సరైన రిలీజ్ డేట్ కోసం ఎదురచూస్తూ ల్యాబ్ లో ఉండిపోవాల్సి వచ్చింది.

మే 6న విడుదల చేద్దామని అనుకున్నా.. అప్పట్లో బ్రహ్మోత్సవంపై క్లారిటీ రాలేదు. ఆ తర్వాత మే 6ను సూర్య 24 ఖాయం చేసుకుంది. ఇప్పుడు మే 20న మహేష్ బాబు మూవీ బ్రహ్మోత్సవం విడుదల ఫైనల్ కావడంతో.. ఆ తర్వాత రెండు వారాలకు డేట్ ని ఫిక్స్ చేసుకున్నారు. జూన్ 3న అ..ఆ..ను విడుదల చేయాలని నిర్ణయించారు. నిజానికి ఈ డేట్ పై కూడా అనుమానాలు ఉన్నా.. సౌతిండియా సూపర్ స్టార్ రజినీకాంత్ మూవీ కబాలి జూలై 1కి పోస్ట్ పోన్ కావడంతో.. అ..ఆ..ను జూన్ 3కు ఫిక్స్ చేసుకున్నారు.

అ..ఆ.. విడుదలపై త్రివిక్రమ్ కానీ, యూనిట్ కానీ ఇంకా అధికారికంగా ప్రకటించలేదు. ఇప్పుడు టాలీవుడ్ అంతా బ్రహ్మోత్సవం హంగామా నడుస్తుండడంతో.. అది రిలీజ్ అయిన 4-5 రోజుల తర్వాత అ..ఆ.. రిలీజ్ పై అనౌన్స్ మెంట్ ఇవ్వాలని నిర్ణయించాడట త్రివిక్రమ్.