పునీత్ రాజ్ కుమార్ బయోపిక్ ప్లాన్?

కన్నడ పవర్ స్టార్ పునీత్ రాజ్ కుమార్ (45) ఆకస్మిక మరణం అభిమానులు జీర్ణించుకోలేనిది. అతిలోక సుంద‌రి శ్రీ‌దేవి మ‌ర‌ణం త‌ర‌హాలోనే అంత‌గా పునీత్ ఆక‌స్మిక‌ మ‌ర‌ణం ఎంతో ఆశ్చ‌ర్య‌ప‌రిచింది. గుండె పోటుతో అత‌డు స‌డెన్ డెత్ కి గుర‌య్యాడు. ఇది శాండల్ వుడ్ చిత్ర పరిశ్రమకు తీరని లోటు. పునీత్ ఇంత‌కుముందు `యువరత్న`లో చివరిగా కనిపించాడు. అతని తదుపరి చిత్రాల విడుదల కోసం అభిమానులు నిరాశగా ఉన్నారు. ఇంత‌లోనే ఒక వీరాభిమాని కన్నడ దర్శకుడు సంతోష్ ఆనంద్ ని పునీత్ బయోపిక్ తీయమని కోర‌డం చ‌ర్చ‌నీయాంశ‌మైంది. ఆయ‌న‌ సానుకూల రీతిలో సమాధానం ఇవ్వ‌డంతో పునీత్ బ‌యోపిక్ పై ఆస‌క్తి నెల‌కొంది.

``సంతోష్ ఆనంద్ సార్ దయచేసి అప్పు సార్ పై బయోపిక్ తీయండి సార్.. మీరు అతన్ని దగ్గరగా చూశారు. అతని ప్రేమ .. విలువలను తెలిసిన వారిగా.. దయచేసి సినిమా చేయండి`` అని అభిమాని అభ్య‌ర్థించాడు. దీనికి సంతోష్ ఆనంద్ రామ్ స్పందిస్తూ.. ``ఈ ఆలోచనను తెరపైకి తీసుకురావడానికి నేను నా స్థాయిలో ప్రయత్నిస్తాను.. #అప్పు స‌ర్ లివ్స్ ఆన్`` అని బదులిచ్చారు. పునీత్ రాజ్ కుమార్ జీవితాన్ని సినిమాగా తీయాలంటే సంతోష్ ఆనంద్ రామ్ సరైన ఎంపిక అని చాలామంది నెటిజనులు అభిప్రాయం వ్యక్తం చేశారు. కొంతమంది అభిమానులు కూడా దర్శకుడిని బయోపిక్ తీయమని ప్రోత్సహించారు. సంతోష్ - పునీత్ రాజ్ కుమార్ చాలా సన్నిహితంగా ఉండేవారు. రెండు బ్లాక్ బస్టర్ చిత్రాలకు కలిసి పనిచేశారు.

వీరిద్దరూ కలిసి `రాజకుమార` అనే బ్లాక్ బస్టర్ చిత్రాన్ని అందించారు. నాలుగేళ్ల తర్వాత మళ్లీ యువరత్నలో కలిసి నటించారు. వాస్తవానికి దర్శకుడు మూడవసారి క‌లిసి ప‌ని చేయాలని కోరుకున్నాడు. ప్ర‌స్తుతం ఈ మూవీ స్క్రిప్ట్ కోసం ఆలోచన సాగుతోంది. అప్పుడే ఈ దురదృష్టకర సంఘటన జరిగింది. పునీత్ మరణానంతరం `జేమ్స్` విడుద‌ల కానుంది. ఈ చిత్రం ఆయన పుట్టిన రోజు మార్చి 17న థియేటర్లలోకి రానుంది.