లవ్ సీజన్ స్పెషల్ గా 'గుర్తుందా శీతాకాలం' మెలోడీ..!

మిల్కీ బ్యూటీ తమన్నా భాటియా - టాలెంటెడ్ యాక్టర్ సత్యదేవ్ జంటగా నటిస్తున్న ప్రేమకథా చిత్రం ''గుర్తుందా శీతాకాలం''. నాగశేఖర్ దర్శకత్వంలో తెరకెక్కుతున్న ఈ సినిమాలో మేఘా ఆకాష్ - కావ్య శెట్టి కీలక పాత్రలు పోషిస్తున్నారు. ఇది కన్నడలో విజయవంతమైన 'లవ్ మాక్ టైల్' అనే రొమాంటిక్ మ్యూజికల్ ఎంటర్టైనర్ కు తెలుగు రీమేక్. ఇప్పటికే షూటింగ్ పూర్తి చేసుకున్న ఈ సినిమా త్వరలోనే ప్రేక్షకుల ముందుకు రానుంది.

ఇప్పటికే ఈ చిత్రం నుంచి వచ్చిన ప్రచార చిత్రాలు ఆకట్టుకున్నాయి. మ్యూజికల్ ప్రమోషన్స్ లో భాగంగా తాజాగా 'గుర్తుందా శీతాకాలం' టైటిల్ ట్రాక్ ని మేకర్స్ రిలీజ్ చేసారు. ''క్యాచ్ పడితే అవుట్ అంటారే.. బయట పడితే సిక్స్ అంటారే.. వెంటపడితే ప్రేమంటారే.. కంటపడితే తిడుతుంటారే.. ఓ డిసెంబర్ పువ్వుని కలిశా.. ఈ తుషారం తనలో చూసా.. మ్యాజిక్ అంటే ఏంటో తెలుసా.. మనం కలిసిన డేటే బహుశా..'' అంటూ సాగే ఈ గీతం శ్రోతలను అలరిస్తోంది.

యువ సంగీత దర్శకుడు కాలభైరవ ఈ మెలొడీకి స్వరాలు సమకూర్చగా.. సింగర్ సంజిత్ హెగ్డే వినసొంపుగా ఆలపించారు. లిరిసిస్ట్ శ్రీమణి క్యాచీ లిరిక్స్ రాసారు. ఇందులో తొలిసారి కలిసి నటిస్తున్న తమన్నా - సత్యదేవ్ మధ్య కెమిస్ట్రీ బాగా కుదిరినట్లు తెలుస్తోంది. నిధి పాత్రలో నటించిన మిల్కీ బ్యూటీ పొట్టిపొట్టి దుస్తుల్లో కనిపించి ఆకట్టుకుంది. సత్యా హెగ్డే సినిమాటోగ్రఫీ అందించగా.. కోటగిరి వెంకటేశ్వరరావు దీనికి ఎడిటింగ్ వర్క్ చేసారు.

'గుర్తుందా శీతాకాలం' చిత్రాన్ని నాగ‌శేఖ‌ర్ మూవీస్ - శ్రీ వేదాక్షర మూవీస్ - మణికంఠ ఎంటర్టైన్మెంట్స్ బ్యానర్స్ పై రూపొందిస్తున్నారు. చిన బాబు - ఎంఎస్ రెడ్డి సమర్పణలో భావ‌న‌ ర‌వి - నాగశేఖర్ - రామారావు చింతపల్లి సంయుక్తంగా నిర్మిస్తున్నారు. లక్ష్మీభూపాల్ ఈ సినిమాలో సంభాషణలు రాశారు. వాలెంటైన్స్ డే సందర్భంగా చిత్ర ట్రైలర్ ను లాంచ్ చేయనున్నట్లు మేకర్స్ తెలిపారు. కరోనా పాండమిక్ నేపథ్యంలో వాయిదా పడుతూ వచ్చిన ఈ సినిమా విడుదల తేదీపై త్వరలోనే స్పష్టత రానుంది.