తెరపైకి మరోసారి ఢీ కాంబినేషన్!

టాలీవుడ్ లో కొన్నేళ్ల క్రితం శ్రీను వైట్ల ఒక స్టార్ డైరెక్టర్. కానీ పరిస్థితి ఇప్పుడు ఎలా ఉంది అనేది అందరికి తెలిసిన విషయమే. ఎందుకంటే గత కొన్నేళ్ళుగా ఆయనకి అస్సలు హిట్స్ లేవు. మహేష్ బాబుకి "ఆగడు", రామ్ చరణ్ కి "బ్రూస్ లీ", వరుణ్ తేజ్ కి "మిస్టర్" అలాగే ఇటివలే రవితేజ కి "అమర్ అక్బర్ అంటోనీ" వంటి భారీ డిసాస్టర్స్ ని కట్టబెట్టాడు శ్రీనువైట్ల. కనీసం "అమర్ అక్బర్ అంటోనీ" సినిమాతో అయిన హిట్ కొడతాడు అనుకుంటే అసలు చాలా దారుణమైన సినిమాని తెలుగు ప్రేక్షకులకి అందించాడు. ఇక తెలుగు హీరోలు ఎవ్వరు శ్రీనువైట్లకి డేట్స్ ఇవ్వరు అని అనుకునే సమయంలో మంచు విష్ణు మాత్రం శ్రీనువైట్లకి తన డేట్స్ ఇవ్వడానికి సిద్ధం అయ్యాడట. "ఆచారి అమెరికా యాత్ర" సినిమా తరువాత ఒక్క సినిమా కూడా సైన్ చేయలేదు విష్ణు. మరి శ్రీను వైట్లతో సినిమాకి ఎలా ఓకే చెప్పాడు అని అంతా ఆలోచనలో పడ్డారు. వీళ్ళిద్దరి కాంబినేషన్లో 2007లో "ఢీ" సినిమా విడుదలై బ్లాక్ బస్టర్ హిట్ అందుకుంది.

దాదాపు 12 సంవత్సరాల తర్వాత మళ్లీ వీరిద్దరి కాంబినేషన్ సెట్ కాబోతుంది. అయితే విష్ణు కోసం ఫుల్ లెంగ్త్ కామెడీ ఎంటర్టైనర్ స్క్రిప్ట్ సిద్ధం చేస్తున్నాడట డైరెక్టర్. అయితే ఈ సినిమాకి 'ఢీ-2' అనే టైటిల్ అనుకుంటున్నారట. ఢీ-2 అంటే.. డేరింగ్ అండ్ డాషింగ్ అనే కాప్షన్ ఉండబోతున్నట్లు తెలుస్తుంది. ఇక ఈ సినిమాలో యాక్షన్ సన్నివేశాలు బాగానే ఉంటాయట. ఇదిలా ఉండగా విష్ణు ప్రధాన పాత్ర పోషిస్తున్న ఈ సినిమాలో హీరోయిన్ ఎవరు అనేది ఇంకా తెలియాల్సి ఉంది. మరో విషయం ఏంటంటే.. ప్రస్తుతం హీరో డైరెక్టర్ ఇద్దరు ఫామ్ లో లేకపోవడం వలన నిర్మాతలు కూడా ముందుకొచ్చేలా కనిపించడం లేదు. అందుకే ఈ సినిమా నిర్మాణ బాధ్యతలు కూడా హీరో విష్ణునే తీసుకుంటున్నట్లు సమాచారం. ఇద్దరు ఫామ్ లో లేరు కాబట్టి ఇండస్ట్రీలో కాస్త విమర్శలు బాగానే వినిపిస్తున్నాయి. దాదాపు దశాబ్ద కాలం మించిన తర్వాత రిపీట్ కాబోతున్న కాంబినేషన్ మళ్లీ హిట్ అందుకొని ఫామ్ లోకి వస్తారో లేదో చూడాలి!