'24'కి సీక్వెల్ ఖాయమంటున్న డైరెక్టర్!

మొదటి నుంచి కూడా విక్రమ్ కుమార్ విభిన్నమైన కథలకు ప్రాధాన్యతనిస్తూ ఉంటాడు. అలాగే స్క్రిప్ట్ విషయంలో ఆయన చాలా కేర్ తీసుకుంటాడు. స్క్రిప్టుపై గట్టిగానే కసరత్తు చేస్తూ ఉంటాడు. అందువల్లనే సినిమాకి .. సినిమాకి మధ్య ఎక్కువ గ్యాప్ కనిపిస్తూ ఉంటుంది. అలాగే ఎప్పటికప్పుడు ఆయన జోనర్లు మార్చేస్తూ వెళుతుంటాడు. తెలుగులో 'నానీస్ గ్యాంగ్ లీడర్' సినిమాతో ఆయన ఒక కొత్త పాయింట్ ను టచ్ చేశారు. ఆ తరువాత సినిమాకి ఆయన చాలా గ్యాప్ తీసుకున్నారు. ఆయన తాజా చిత్రంగా ప్రేక్షకుల ముందుకు 'థ్యాంక్యూ' వస్తోంది.

నాగచైతన్య - రాశి ఖన్నా .. మాళవిక నాయర్ .. అవికా గోర్ ప్రధానమైన పాత్రలను పోషించిన ఈ సినిమా కూడా ఒక కొత్త పద్ధతిలోనే నడవనుంది. హీరో జర్నీలో తనకి తారసపడే వ్యక్తులు .. అనుభవాలు .. అనుభూతులు .. జ్ఞాపకాలతో ఈ కథ నడవనుంది. తమన్ ఈ సినిమాకి సంగీతాన్ని సమకూర్చాడు.

దిల్ రాజు నిర్మించిన ఈ సినిమా, ఈ నెల 22వ తేదీన ప్రేక్షకుల ముందుకు రానుంది. ఈ నేపథ్యంలో ఈ సినిమా ప్రమోషన్స్ ఊపందుకున్నాయి. తాజా ఇంటర్వ్యూలో విక్రమ్ కుమార్ సినిమాను గురించి మాట్లాడుతూ ఉండగా, గతంలో ఆయన రూపొందించిన '24' సినిమా ప్రస్తావన వచ్చింది.

"నేను తెరకెక్కించిన సినిమాలలో '24' అంటే నాకు చాలా ఇష్టం. ఆ తరహా సినిమాలు అంతకుముందు తమిళంలోగానీ .. తెలుగులోగాని రాలేదు. కథా పరంగా లోపాలు కనిపించకూడదు .. పాత్రల లుక్ డిఫరెంట్ గా ఉండాలి. ఇద్దరి సూర్యల పాత్రల మధ్య .. స్వభావాల మధ్య పూర్తి వైవిధ్యం ఉండాలి. అందుకోసం కాగితాలపైనే కాదు టెక్నికల్ గా కూడా ఎంతవరకూ సాధ్యమవుతుందనేది చూసుకోవాలి. అనుకున్న అవుట్ పుట్ రావడానికి చాలా కష్టపడవలసి వచ్చింది.

అందువల్లనే ఇప్పటికీ టీవీలో ఆ సినిమాను చూడటానికి చాలామంది ఆసక్తిని చూపుతున్నారు. ఆ సినిమాకి సీక్వెల్ చేయమని చాలామంది అడుగుతున్నారు. సోషల్ మీడియా ద్వారా కూడా చాలామంది అదే అభిప్రాయాన్ని వ్యక్తం చేస్తున్నారు.

అందువలన ఆ సినిమాకి సీక్వెల్ చేయాలనే ఆలోచనలో ఉన్నాను. సీక్వెల్ కూడా సూర్యతోనే ఉంటుంది. అన్నీ కుదిరితే అనుకున్నట్టుగానే ఈ ప్రాజెక్టు పట్టాలపైకి వెళుతుంది" అంటూ చెప్పుకొచ్చారు. ప్రస్తుతం 'దూత' అనే వెబ్ సైట్ పనులతో బిజీగా ఉన్న విక్రమ్ కుమార్, బాలీవుడ్ లోను ఒక ప్రాజెక్టును లైన్లో పెట్టే పనిలో ఉన్నారు.