‘బాహుబలి’కి చేసినోళ్లే.. ‘స్పైడర్’కూ

ప్రభాస్.. అల్లు అర్జున్ లాంటి టాలీవుడ్ స్టార్లకు పొరుగు రాష్ట్రాల్లో మార్కెట్ బాగా పెరిగింది. వాళ్ల కంటే పెద్ద స్టార్లయిన పవన్ కళ్యాణ్.. మహేష్ బాబు మాత్రం ఇంకా ఇతర రాష్ట్రాల్లో తమ మార్కెట్ ను విస్తరించలేకపోయారు. పవన్ కళ్యాణ్ ఆల్రెడీ ‘సర్దార్ గబ్బర్ సింగ్’తో ఉత్తరాదిన పాగా వేసే ప్రయత్నం చేశాడు కానీ.. అది అంత మంచి ఫలితాన్నివ్వలేదు.

ఇప్పుడు మహేష్ బాబు మాత్రం పక్కా ప్లానింగ్ తో రంగంలోకి దిగుతున్నాడు. తమిళ స్టార్ డైరెక్టర్ మురుగదాస్‌ తో చేస్తున్న ‘స్పైడర్’ను ద్విభాషా చిత్రంగా చేయడం ద్వారా తమిళ నాట మార్కెట్ తెచ్చుకునే ప్రయత్నం చేస్తున్నాడు. ఎక్కువగా తమిళ నటీనటులు.. సాంకేతిక నిపుణుల్ని పెట్టుకోవడం.. అన్నింటికీ మించి మురుగదాస్ డైరెక్షన్లో చేస్తుండటం వల్ల ‘స్పైడర్’తో తమిళ జనాల్లోకి మహేష్ బాగానే దూసుకెళ్తాడని భావిస్తున్నారు.

మరోవైపు ‘స్పైడర్’ను ఉత్తరాదిన కూడా భారీ స్థాయిలో రిలీజ్ చేసేందుకు చిత్ర బృందం సన్నాహాలు చేస్తోంది. మహేష్ బాలీవుడ్లో సినిమాలు చేయకపోయినా.. ఉత్తరాదిన కూడా బాగానే పాపులర్. ఇక మురుగదాస్ ‘గజిని’.. ‘హాలిడే’ లాంటి సినిమాలతో అక్కడ ఫాలోయింగ్ సంపాదించుకున్నాడు. ఈ నేపథ్యంలో ‘స్పైడర్’ను ఉత్తరాదిన పెద్ద ఎత్తున రిలీజ్ చేసేందుకు ప్రయత్నాలు జరుగుతున్నాయి.

‘బాహుబలి: ది కంక్లూజన్’ను హిందీలో రిలీజ్ చేసి.. ‘2.0’ హక్కులు కూడా తీసుకున్న ప్రముఖ డిస్ట్రిబ్యూషన్ సంస్థ ‘ఏఏ ఫిలిమ్స్’కు ‘స్పైడర్’ బాధ్యతలు అప్పగించారు. డిస్ట్రిబ్యూషన్లో ఆ సంస్థకు చాలా మంచి పేరుంది. తెలుగు.. తమిళం వెర్షన్లను ఈ చిత్రం ఉత్తరాదిన పెద్ద స్థాయిలో విడుదల చేయబోతోంది. మరి ఫలితం ఎలా ఉంటుందో చూడాలి.