ఎమోషనల్ డ్రామాగా తెరకెక్కుతున్న AA20..?

అల్లు అర్జున్ - సుకుమార్ దర్శకత్వంలో తన కెరీర్లో 20వ చిత్రంగా రూపొందబోతున్న సినిమాను పట్టాలెక్కించిన విషయం తెలిసిందే. డైరెక్టర్ సుకుమార్, స్టైలిష్ స్టార్ అల్లు అర్జున్ కాంబినేషన్ అంటే మనకు గుర్తొచ్చే సినిమా ‘ఆర్య’. వాస్తవానికి అల్లు అర్జున్‌కు స్టార్ డమ్‌ను తీసుకొచ్చిన సినిమా కూడా ఇదే. ఆ తరవాత వీరిద్దరి కాంబినేషన్‌లో ‘ఆర్య 2’ వచ్చినా పెద్దగా ఆకట్టుకోలేకపోయింది. ఇప్పుడు ముచ్చటగా మూడోసారి వీరిద్దరూ జతకట్టారు. వీరిద్దరి గత చిత్రాలు మంచి విజయాన్ని సొంతం చేసుకున్నాయి. బన్నీ 'అల వైకుంఠపురంలో', సుకుమార్ 'రంగస్థలం' సినిమాలతో మంచి ఊపు మీదున్నారు. ఈ చిత్రంపై భారీ అంచనాలుండటానికి ఇది కూడా ఒక కారణం. అయితే ఈ చిత్రానికి సంబంధించి మరో కొత్త విషయం బయటకి వచ్చింది. ఈ సినిమా ఒక హై వోల్టాజ్ యాక్షన్ డ్రామాగా తెరకెక్కబోతుందని సమాచారం. సుకుమార్ గత చిత్రం రంగస్థలంలో లాగే ఫుల్ ఎమోషన్స్ తో సాగే యాక్షన్ డ్రామా అని, అల్లు అర్జున్ కెరీర్లో యాక్టింగ్ పరంగా కూడా గుర్తుండిపోయే సినిమా అవుద్దని అనుకుంటున్నారు.

అంతేకాకుండా శేషాచలం అడవుల్లో గంధపు చెక్కల స్మగ్లింగ్ నేపథ్యంలో ఈ చిత్రం తెరకెక్కుతున్నట్లు సమాచారం. ఈ సినిమాలో అల్లు అర్జున్ గుబురు గడ్డంతో లారీ డ్రైవరుగా కనిపించనున్నారు. మైత్రీ మూవీస్ బ్యానర్‌లో తెరకెక్కుతున్న ఈ చిత్రానికి సుకుమార్ ఆస్థాన సంగీత దర్శకుడు దేవిశ్రీప్రసాద్ సంగీతం అందిస్తున్నారు. తమిళ హీరో విజయ సేతుపతి ప్రధాన పాత్రలో నటిస్తున్న ఈ సినిమాలో రష్మిక మదన్న హీరోయిన్ గా నటిస్తుందని సమాచారం. కరోనా ప్రభావ పరిస్థితులు అనుకూలించిన వెంటనే షూటింగులో పాల్గొనే అవకాశం ఉంది.