ఫోటో స్టోరి: బుల్లెట్టు ఎక్కిన ఆర‌డుగుల బుల్లెట్టు!

`న‌టించేప్పుడు వేరే ఫీలింగ్స్ ఏవీ ఉండ‌వు.. రొమాన్స్ అయితే రొమాన్స్.. యాక్షన్ అయితే యాక్ష‌న్.. ఏ ప‌నిలో దిగితే ఆ ప‌నికి న్యాయం చేయ‌డం ఒక్క‌టే న‌టుడి ప‌ని`` అని చెబుతారు ఆది పినిశెట్టి. తాను చేసే ప‌నేంటి? అన్న‌ది ఒక్క‌టే చూస్తాన‌ని ముఖానికి రంగేసుకుని న‌ట‌న‌లోకి దిగాక ఎదుట ఉన్న‌ది ఎవ‌రు? అన్న‌ది కూడా త‌న‌కు అన‌వ‌స‌రం అని అన్నారు. అంత క‌మిటెడ్ గా న‌టిస్తాడు కాబ‌ట్టే ఎంద‌రో అగ్ర కుటుంబ‌ హీరోలు .. న‌ట‌వార‌సులు ఉన్న టాలీవుడ్ కోలీవుడ్ లో రాణిస్తున్నాడు ఈ తెలుగు కుర్రాడు.

ఆది తొంద‌ర్లోనే శివుడు అనే చిత్రంతో తెలుగు ప్రేక్ష‌కుల ముందుకు రానున్నాడు. ఏ గ్లింప్స్ ఇన్ టు ది వ‌రల్డ్ ఆఫ్ #SIVUDU.. యాక్షన్ ఫిలింతో దూసుకొస్తున్నాన‌ని తెలిపాడు. సుశీంద‌ర‌న్ ద‌ర్శ‌క‌త్వం వ‌హిస్తున్న ఈ చిత్రానికి స‌త్య పినిశెట్టి నిర్మాత‌. నిక్కి గ‌ర్లానీ క‌థానాయిక‌. మ‌లుపు- గుండెల్లో గోదారి లాంటి క్లాసిక్ చిత్రాల్లో న‌టించిన ఆది పినిశెట్టి శివుడిగా ఏ మేర‌కు మెప్పిస్తాడ‌న్న‌ది వేచి చూడాలి.

సినిమా సంగ‌తేమో కానీ ఆది పినిశెట్టి ఇటీవ‌ల ఇన్ స్టా మాధ్య‌మంగా చాలా కొత్త సంగ‌తుల్ని ప్ర‌మోట్ చేస్తున్నారు. తాజాగా #CRUDO బుల్లెటీర్ క‌స్ట‌మ్స్ కి ప్ర‌మోష‌న్ చేస్తూ క‌నిపించాడు. బుల్లెట్టు ఎక్కిన ఆర‌డుగుల బుల్లెట్టులా స్టైలిష్ లుక్ తో షేక్ చేశాడు ఆది. ఈ లుక్ లో చాలా ఎగ్రెస్సివ్ గా క‌నిపిస్తున్నాడు. అయితే పొగ తాగ‌డం హానిక‌రం అన్న‌ది అత‌డు గ‌మ‌నించిన‌ట్టు లేదు..! లివ్ ఇట్.. ఆర్ బ‌ర్న్ ఇట్.. ఫ్రైడే! అంటూ ప్ర‌చారం చూస్తుంటే క‌స్ట‌మ్డ్ బుల్లెట్టుపై త‌న‌కు ఉన్న ప్రేమ‌ను క‌న‌బ‌రుస్తున్న‌ట్టే క‌నిపిస్తోంది.