షాక్ లో అమీర్! న‌ష్ట‌ప‌రిహారం కావాలంటూ ఒత్తిడి!?

`లాల్ సింగ్ చడ్డా` వైఫల్యంతో అమీర్ ఖాన్ దిగ్భ్రాంతికి గురయ్యార‌ని ముంబై మీడియా క‌థ‌నాలు వెలువ‌రిస్తోంది. ఈ మూవీ డిజాస్ట‌ర్ రిజ‌ల్ట్ గురించి అమీర్ తీవ్రంగా క‌ల‌త‌కు గుర‌య్యార‌ని షాక్ నుంచి తేరుకోలేద‌ని స‌ద‌రు క‌థ‌నాల్లో పేర్కొన‌డం హాట్ టాపిక్ గా మారింది. బాలీవుడ్ లో ఘ‌న‌మైన ఎంట్రీని కోరుకున్న నాగ‌చైత‌న్య‌కు కూడా ఇది ఊహించ‌ని షాక్.

లాల్ సింగ్ చద్దా ఈ సంవత్సరం మోస్ట్ అవైటెడ్ మూవీగా ప్ర‌చారంలో నిలిచింది. కానీ రిలీజ్ ముందు బ‌జ్ లేకుండానే రావాల్సి వ‌చ్చింది. ట్రైల‌ర్ ద‌శ‌లోనే నిరాశ‌ను మిగిల్చింద‌ని విమ‌ర్శ‌లొచ్చాయి. రిలీజ్ డే ఈ చిత్రం గొప్ప సమీక్షలను అందుకోలేదు. అలాగే ఈ చిత్రానికి సంబంధించిన నటీనటులు సిబ్బంది చాలా ఆశించినా కానీ బాక్సాఫీస్ వద్ద ఘ‌న‌ స్వాగతాన్ని అందుకోలేదు. అమీర్ కెరీర్ లో నే లాల్ సింగ్ చ‌డ్డా చెత్త ఓపెనింగుల‌తో రికార్డుకెక్కింది. ప్రస్తుతం సోర్స్ ప్ర‌కారం.. లాల్ సింగ్ చద్దా భారీ వైఫల్యానికి అమీర్ ఖాన్ షాక్ లో ఉన్నట్లు తెలుస్తోంది.

హాలీవుడ్ క్లాసిక్ హిట్ `ఫారెస్ట్ గంప్` ఉత్తమ వెర్షన్ ను సాధ్యం చేయడానికి అమీర్ చాలా కష్టపడ్డాడు. లాల్ సింగ్ చ‌డ్డా నిర్మాణం కోసం భారీ బ‌డ్జెట్ ని ఖ‌ర్చు చేశాడు. కానీ ఏదీ వ‌ర్క‌వుట్ కాలేదు. ప్రేక్ష‌కుల‌ తిరస్కరణ అతన్ని చాలా తీవ్రంగా దెబ్బతీసిందని అమీర్ - అతని మాజీ భార్య కిరణ్ రావుల‌కు అత్యంత‌ సన్నిహితుడు ఒక‌రు వ్యాఖ్యానించిన‌ట్టు తెలిసింది. ఈ భారీ ఎదురుదెబ్బతో తక్షణమే `లాల్ సింగ్ చడ్డా` వ‌ల్ల‌ భారీగా నష్టపోయిన పంపిణీదారులకు ధ‌న‌రూపేణా పరిహారం ఇవ్వాల్సి ఉంటుంద‌ని క‌థ‌నాలు వెల్ల‌డిస్తున్నాయి.

అమీర్ సహ నిర్మాతగా వ్య‌వ‌హ‌రించ‌డంతో సినిమా పరాజయానికి త‌నే స్వ‌యంగా బాధ్యత వహించాడు. డిస్ట్రిబ్యూటర్ల కు కలిగే భారీ నష్టాలను పాక్షికంగా భర్తీ చేయడానికి కృషి చేస్తున్నాడని కూడా టాక్ వినిపిస్తోంది. త‌న సినిమాల‌తో న‌ష్ట‌పోయిన పంపిణీదారుల‌ను ఆదుకునే మంచి అల‌వాటు అమీర్ ఖాన్ కి ఉంది. ఒక్కోసారి అనుకున్న‌ది జ‌ర‌గ‌క‌పోతే దానిని జీర్ణించుకోవ‌డం క‌ష్ట‌మే. కానీ అమీర్ ఖాన్ దీనిని నెమ్మ‌దిగా డైజెస్ట్ చేసుకోవాల్సి ఉంటుంద‌న్న వ్యాఖ్య‌లు వినిపిస్తున్నాయి.

లాల్ సింగ్ వ‌సూళ్లు ఎలా ఉన్నాయి?

ట్రేడ్ వివ‌రాల ప్రకారం లాల్ సింగ్ చద్దా ఆదివారం దేశీయ సర్క్యూట్ లో 9.5-10.5 కోట్ల మేర ఆర్జించింది. దీనితో నాలుగు రోజుల వారాంతపు వ‌సూళ్లు దాదాపు 37-38 కోట్లకు చేరాయి. వినేందుకు ఈ సంఖ్య గణనీయంగా కనిపించవచ్చు కానీ మూవీ అత్యంత‌ విస్తృతంగా థియేట‌ర్ల‌లో విడుదలైంది. ఇది అమీర్ రేంజు కాదు అన్న విమ‌ర్శ‌లు ఎదుర‌వుతున్నాయి. అమీర్ స్టార్ పవర్ కారణంగా ఆరంభం అంచనాల కంటే చాలా తక్కువగా ఉంది. భూల్ భూలయ్యా 2 అత్యంత చిన్న చిత్రం.. తొలి వారాంతంలో ఈ మూవీ కంటే చాలా మెరుగ్గా ఆడింది. కార్తీక్ ఆర్యన్- టబు- కియారా అద్వానీ ప్రధాన పాత్రల్లో నటించిన భూల్ భూలయ్యా 2 మే 20న విడుదలైంది. ప్రారంభ వారాంతంలో రూ.55 కోట్లు రాబట్టింది. ఈ సంఖ్య ప్రస్తుతం లాల్ సింగ్ చద్దా కంటే చాలా ఎత్తున ఉంది.

లాల్ సింగ్ చడ్డాకు సోమవారం స్వాతంత్య్ర‌ దినోత్సవం ..జన్మాష్టమి మరొక ప్రధాన సెలవుదినం క‌లిసి రానున్నాయి. గురువారం శుక్ర‌వారం కూడా జ‌న్మాష్ఠ‌మి కార‌ణంగా ఆదాయాన్ని కొన‌సాగించే అవకాశం ఉంది. వారంలో చాలా సెలవులు ఉన్నందున ఈ చిత్రం ఎనిమిదవ రోజు నాటికి పెద్ద మొత్తాన్ని సంపాదించాలి. కానీ మొదటి రోజు తర్వాత భారీ పతనం తో ఇప్పుడు వేగం పుంజుకునే అవకాశం లేదు. ప్రస్తుత ట్రెండ్‌ల ప్రకారం చూస్తే.. లాల్ సింగ్ చద్దా తన పూర్తి రన్ ముగిసే సమయానికి దేశీయంగా రూ.100 కోట్ల మార్కు కంటే తక్కువగా ఉండే అవకాశం ఉందని ఇది అమీర్ కు తీవ్ర నిరాశ కలిగించవచ్చని ఇండస్ట్రీ ఇన్ సైడర్స్ అంటున్నారు.