అందనంత ఎత్తులో అమీర్ ఖాన్

మామూలుగానే అమీర్ ఖాన్ ను అందుకోవడానికి ఇండియాలోని మిగతా హీరోలు చాలా కష్టపడుతున్నారు. గత కొన్నేళ్లలో ఇంతింతై అన్నట్లుగా ఎదిగిపోయాడు అమీర్ ఖాన్. ఫాలోయింగ్ విషయంలో అయినా.. పారితోషకం విషయంలో అయినా అమీర్ ను అందుకునే హీరోలెవ్వరూ లేరిప్పుడు. ‘దంగల్’ సినిమాకు అమీర్ ఏకంగా రూ.75 కోట్ల పారితోషకం తీసుకున్నాడట. ఐతే ఈ చిత్రం చైనాలో అమీర్ కు ఉన్న బ్రాండ్ వాల్యూ వల్లే పెద్ద ఎత్తున విడుదలైంది. ఏకంగా వెయ్యి కోట్ల వసూళ్లు సాధించింది. ఇప్పుడు ‘దంగల్’ ఓవరాల్ కలెక్షన్ల లెక్కలు చూస్తే.. అమీర్ తీసుకున్న రూ.75 కోట్ల పారితోషకం తక్కువే అనిపిస్తోంది. అతడి తర్వాతి సినిమాకు పారితోషకం ఏ స్థాయిలో ఉంటుందో అంచనా వేయడం కూడా కష్టంగానే ఉంది.

ఒకప్పుడు ఇండియాలోనే నెంబర్ వన్ హీరోగా ఉన్న షారుఖ్ ఖాన్.. ఇప్పుడు అమీర్‌ కు దరిదాపుల్లో లేడు. సల్మాన్ ఖాన్ వరుస హిట్లతో ఊపుమీదున్నాడు కానీ.. అతను కూడా అమీర్ ఖాన్ ను అందుకునే స్థితిలో లేడు. సూపర్ స్టార్ రజినీకాంత్ కు మంచి క్రేజే ఉంది.. పారితోషకమూ ఎక్కువే కానీ.. ఆయన ఆల్ ఇండియా స్టార్ కాదు కాబట్టి అమీర్ ను అందుకునే స్థాయిలో లేడు. చైనాలో కూడా భారీగా మార్కెట్ సంపాదించిన నేపథ్యంలో అమీర్ బ్రాండ్ వాల్యూ బాగా పెరిగింది. ఆయన సినిమాకు వచ్చే లాభాల్లో భారీగా వాటా అడుగుతున్నాడట. ‘థగ్స్ ఆఫ్ హిందోస్థాన్’ సినిమాకు అమీర్ పారితోషకం అనూహ్యంగా ఉండబోతోందంటున్నారు. అమీర్ పాత రికార్డుల్ని అందుకోవడానికే మిగతా హీరోలు ఆపసోపాలు పడుతుంటే.. అతను కలెక్షన్లు.. పారితోషకం విషయంలో కొత్త రికార్డులు నెలకొల్పుతూ ఇంకా ఎత్తుకు ఎదిగిపోతున్నాడు.

Like Us on Facebook : https://www.facebook.com/Tupakidotcom/