‘ది కశ్మీర్‌ ఫైల్స్‌’పై ఆమీర్ ఖాన్ రియాక్షన్

'ది కశ్మీర్‌ ఫైల్స్‌'..దేశవ్యాప్తంగా ఎక్కడ చూసినా ఈ సినిమా గురించే చర్చ. సామాన్యుల నుంచి సెలబ్రిటీల వరకు..ప్రధాని మోడీ మొదలు ఫిల్మ్ క్రిటిక్స్ వరకు అందరి నోట ఒకటే మాట. ఏ మాత్రం అంచనాలు లేకుండా రిలీజైన ఈ సినిమా...కలెక్షన్ల రేసులో గుర్రంలా దూసుకుపోతోంది. కేవలం మౌత్ టాక్ తోనే కంటెంట్ బలంగా ఉన్న ఈ సినిమా...100 కోట్ల క్లబ్ లో చేరి 200 కోట్ల క్లబ్ వైపు పరుగులు పెడుతోంది. ఈ నేపథ్యంలోనే తాజాగా ఈ చిత్రంపై బాలీవుడ్ హీరో ఆమీర్ ఖాన్ స్పందించారు.

ఢిల్లీలో 'ఆర్ఆర్ఆర్' ఈవెంట్ కు ముఖ్య అతిథిగా హాజరైన ఆమీర్ ఖాన్ ఈ సినిమాను భార‌తీయులంద‌రూ చూడాల‌ని పిలుపునిచ్చారు. ఈ సినిమా తాను త‌ప్ప‌కుండా చూస్తాన‌ని, అందరూ చూడాలని విలేకరులు అడిగిన ప్రశ్నకు మిస్టర్ ఫర్ ఫెక్ట్ సమాధానమిచ్చారు. ఈ సినిమా క‌థ దేశ చ‌రిత్ర‌లో భాగ‌మ‌ని, క‌శ్మీర్ పండిట్ ల విష‌యంలో జ‌రిగింది విచార‌క‌రమని ఆమీర్ ఖాన్ ఆవేద‌న వ్య‌క్తం చేశారు. ఇలాంటి అంశంతో కూడిన ఏ సినిమానైనా భారతీయులందరూ చూడాల‌ని చెప్పారు.

మాన‌వ‌త్వాన్ని న‌మ్మే ప్ర‌తి ఒక్క‌రి భావోద్వేగాల‌ను ఈ సినిమా క‌దిలించింద‌ని ఆమీర్ ఖాన్ అన్నారు. ఈ చిత్రం మంచి విజ‌యం సాధించినందుకు హ్యాపీగా ఉంద‌ని చెప్పారు. ఇక, ఈ ప్రమోషన్ ఈవెంట్ లో రామ్ చరణ్, తారక్ లతో అమీర్ ఖాన్ “నాటు నాటు” పాటకు ఊర నాటు స్టెప్స్ వేశారు. అలియా భట్, తారక్, చెర్రీలతో కలిసి మిస్టర్ పర్ ఫెక్ట్ వేసిన స్టెప్పుల వీడియో సోషల్ మీడియాలో వైరల్ అయింది.

మరోవైపు, ఈ నెల 25న ప్రపంచవ్యాప్తంగా ఆర్ఆర్ఆర్ విడుదల కాబోతోన్న నేపథ్యంలో చిత్ర యూనిట్ ప్రమోషన్స్ జోరు పెంచింది. ఇప్పటికే దుబాయ్, కర్ణాటకలో ప్రీ రిలీజ్ ఈవెంట్ నిర్వహించిన చిత్ర యూనిట్...ఈ రోజు రాజస్థాన్ లోని జైపూర్ లో ప్రమోషన్ ఈవెంట్ కార్యక్రమాన్ని నిర్వహించేందుకు రెడీగా ఉంది. అయితే, ఇరు తెలుగురాష్ట్రాల్లో మాత్రం ఈ చిత్రానికి సంబంధించిన ప్రీ రిలీజ్ ఈవెంట్, ప్రమోషన్ ఈవెంట్ లేకపోవడంపై తెలుగు ప్రేక్షకులు అసంతృప్తితో ఉన్నారు.