డేటా చోరీపై అభిమన్యుడి యుద్ధం

విశాల్ హీరోగా రూపొందిన లేటెస్ట్ మూవీ ఇరుంబు తిరాయ్. సమంత అక్కినేని హీరోయిన్ గా నటించిన ఈ చిత్రం.. జనవరి 26న విడుదల కాబోతోంది. సీనియర్ నటుడు అర్జున్ విలన్ పాత్రలో నటించిన చిత్రంపై ఎక్స్ పెక్టేషన్స్ ఎక్కువగానే ఉండగా.. ఇరుంబు తిరాయ్ ను తెలుగులో అభిమన్యుడు పేరుతో డబ్బింగ్ చేసి.. తమిళ్ తో పాటే విడుదల చేయనున్నారు.

ఇప్పుడీ అభిమన్యుడు మూవీ ట్రైలర్ వచ్చేసింది. ట్రైలర్ అంటే హీరో ఎలివేషన్ కు ఉపయోగించే అస్త్రం అనుకుంటాం కానీ.. మూవీ థీమ్ ను ఎంత బాగా చెప్పచ్చో ఈ ట్రైలర్ చూపిస్తుంది. ట్రైలర్ నిడివిలో సగం పాటు కాన్సెప్ట్ ఇంట్రడక్షన్ మాత్రమే చేశారు. ఇవాల్టి రోజుల్లో దొంగలకు తాళం చెవులతో పని లేదని.. కేవలం కొంత ఇన్ఫర్మేషన్ ఉంటే చాలంటూ స్టార్ట్ చేసి.. ఇది ఇన్ఫర్మేషన్ ఏజ్ అని చెప్పిన తీరు బాగుంది. అలాగే డేటాను సంగ్రహించి అమ్ముకోవడంపై.. ఒక్కో డీటైలింగ్ కు ఒక్కో రేటు ఉంటుందని చెప్పిన తర్వాత.. అప్పుడు తొలుత విలన్ గా నటించిన అర్జున్ పాత్రను చూపించారు.

హీరోయిన్ గా నటించిన సమంత కాసేపు మురిపిస్తే.. మేజర్ పాత్రలో విశాల్ నటన మార్వలెస్ అనిపించేయక మానదు. ఈ డేటా మాఫియాను విశాల్ ఎలా ఛేదించాడన్నదే సినిమా థీమ్. ట్రైలర్ లోనే బోలెడన్ని టెక్నికల్ వాల్యూస్ ఉండగా.. ఈ చిత్రాన్ని విశాల్ స్వయంగా నిర్మించడం విశేషం. ఈ హీరో గత చిత్రం డిటెక్టివ్ తెలుగు ఆడియన్స్ ను బాగానే మెప్పించింది. ఈ అభిమన్యుడు కూడా ప్రామిసింగ్ గానే కనిపిస్తుండడంతో.. వరుసగా రెండో హిట్టు కొట్టేసి టాలీవుడ్ లో మళ్లీ పాగా వేస్తాడేమో చూడాలి.