ట్రైలర్ టాక్: మరో కోపిష్టి హీరో అభిమన్యుడు

టాలీవుడ్ లో ఇప్పటికే ఇద్దరు హీరోలు విపరీతమైన కోపంతో కనిపించారు. యాంగర్ మేనేజ్మెంట్ ఇష్యూతో సమస్యలు ఎదుర్కునే హీరోలుగా.. అర్జున్ రెడ్డిలో విజయ్ దేవరకొండ.. నా పేరు సూర్యలో అల్లు అర్జున్ కనిపించారు. ఇప్పుడు అభిమన్యుడు అంటూ కోలీవుడ్ హీరో విశాల్ కూడా అదే తరహా పాత్రలో కనిపిస్తున్నాడు.

ఇరుంబు తిరాయ్ అంటూ తమిళ్ లో ఇప్పటికే సక్సెస్ అనిపించుకున్న విశాల్ మూవీ.. తెలుగులో అభిమన్యుడు అంటూ వస్తున్నాడు. జూన్ 1న ఈ చిత్రం రిలీజ్ కానుండగా.. తెలుగు వెర్షన్ ట్రైలర్ ను ఇప్పుడు రిలీజ్ చేశారు. అత్యంత కోపిష్టి అయిన ఆర్మీ వ్యక్తి పాత్రలో విశాల్ కనిపిస్తుండగా.. ఈ కారణంగా అటు రియల్ లైఫ్ లోను.. ఇటు ప్రొఫెషన్ పరంగాను ఇబ్బందులు పడుతుంటాడు. ఇంతటి కోపం ఉన్న వ్యక్తిని కనీసం ఆరు నెలలు జైల్లో పెడతారు తెలుసా అంటున్న సమంతను కూడా ట్రైలర్ లో చూపించారు.

అయితే.. సినిమాలో అత్యంత కీలకం విలన్ పాత్ర. ఒకప్పుడు యుద్ధాలు అంటే బాంబులు-గన్నులు.. ఆ తర్వాత బయోవార్.. ఇప్పుడు ఇన్ఫర్మేషన్ తోనే యుద్ధం అంటూ సీనియర్ హీరో అర్జున్.. ఈ సినిమాలో విలన్ గా కనిపించనున్నాడు. విలన్ కు హీరోకు మధ్య వచ్చే ఫేస్ టు ఫేస్ సన్నివేశాలు చాలా ఆకట్టుకుంటాయని అంటున్నారు. పీఎస్ మిత్రన్ దర్శకత్వంలో రూపొందిన ఈ చిత్రానికి యువన్ శంకర్ రాజా సంగీతం అందించాడు.