అభినేత్రి 2 రిలీజ్ కు ముహూర్తం కుదిరిందోచ్!

ప్రభుదేవా.. తమన్నా హీరో హీరోయిన్లుగా నటిస్తున్న తమిళ చిత్రం 'దేవి 2'. ఈ సినిమాను తెలుగులో 'అభినేత్రి-2' టైటిల్ తో రిలీజ్ చేసేందుకు సన్నాహాలు చేస్తున్నారు నిర్మాతలు. 2016 లో 'అభినేత్రి' టైటిల్ తో రిలీజ్ అయిన హారర్ కామెడీ సినిమాకు సీక్వెలే ఈ 'అభినేత్రి 2'. ఎ ఎల్ విజయ్ దర్శకత్వంలో తెరకెక్కిన ఈ సినిమాను మే 1 న రిలీజ్ చేస్తున్నామని నిర్మాతలు ప్రకటించారు.

షూటింగ్ పార్ట్ ఇప్పటికే పూర్తి చేసుకున్న ఈ సినిమాకు ప్రస్తుతం పోస్ట్ ప్రొడక్షన్ కార్యక్రమాలు జోరుగా సాగుతున్నాయి. ఈ సినిమాలో సోనూ సూద్..నందితాశ్వేత..డింపుల్‌ హయాతి.. కోవైసరళ ఇతర కీలక పాత్రల్లో నటించారు. ఈ చిత్రానికి సామ్ సి.ఎస్ సంగీతం అందిస్తున్నాడు. అయనక బోస్ సినిమాటోగ్రాఫర్. అభిషేక్‌ పిక్చర్స్‌..ట్రైడెంట్‌ ఆర్ట్స్‌ బ్యానర్లపై అభిషేక్‌ నామా..ఆర్‌ రవీంద్రన్‌ ఈ సినిమాను సంయుక్తంగా నిర్మిస్తున్నారు.

'అభినేత్రి' సినిమాకు ప్రభుదేవా - తమన్నాల జోడీ ఆకర్షణగా నిలిచింది. మొదటి భాగంలాగానే ఇప్పుడు సీక్వెల్ కూడా ప్రేక్షకులను మెప్పిస్తుందని నిర్మాతలు కాన్ఫిడెంట్ గా ఉన్నారు. నిఖిల్ హీరోగా నటించిన 'అర్జున్ సురవరం' కూడా మే 1 న రిలీజ్ అవుతుంది కాబట్టి 'అభినేత్రి 2' కు బాక్స్ ఆఫీస్ దగ్గర పోటీ తప్పదు.