రోబో-2లో అమితాబ్, అభిషేక్

‘రోబో’ సినిమాలో ప్రొఫెసర్ బోరా పాత్రకు శంకర్ ముందుగా అమితాబ్ బచ్చన్ నే తీసుకోవాలని అనుకున్నసంగతి తెలిసిందే. ఐతే అమితాబ్ విలన్ పాత్ర చేస్తే చూడరంటూ రజినీకాంతే ఆ ఆలోచనకు బ్రేక్ వేసేశాడు. దీంతో సౌత్ ఇండియన్ సూపర్ స్టార్ సినిమాలో బాలీవుడ్ మెగా స్టార్ ను చూసే అవకాశాన్ని కోల్పోయారు అభిమానులు. ఐతే అప్పుడు ఛాన్స్ మిస్సయింది కానీ.. రోబో-2లో మాత్రం రజినీ - అమితాబ్ లను కలిసి చూసే అవకాశం ఉందని కోలీవుడ్ సమాచారం.

ఐతే రోబో-2లో ఆల్రెడీ అక్షయ్ కుమార్ విలన్ పాత్ర చేస్తున్నాడు కదా.. మరి అమితాబ్ ఏం పాత్ర చేస్తాడా అని ఆశ్చర్యపోకండి. ఆయన ప్రత్యేకంగా ఓ పాత్రలో చేయట్లేదు. ఊరికి ఒకట్రెండు నిమిషాల పాటు క్యామియో రోల్ లో తళుక్కుమనబోతున్నాడు. ఇటీవలే దానికి సంబంధించి షూటింగ్ కూడా పూర్తయిందట. అమితాబ్ తో పాటు ఆయన తనయుడు అభిషేక్ కూడా ‘రోబో-2’లో కనిపిస్తారని సమాచారం.

ఇంతకీ అమితాబ్ రోబో-2లో కనిపించడానికి కారణం ఏంటంటే.. ఇటీవలే ఢిల్లీలోని ఓ ఇంటర్నేషనల్ స్టేడియంలో ఈ సినిమాకు సంబంధించిన సన్నివేశాలు చిత్రీకరించాడు శంకర్. స్పోర్ట్స్ బ్యాగ్రౌండ్ లో సాగే ఆ సన్నివేశాల్లో స్పోర్ట్స్ ఫ్రాంఛైజీల యజమానులుగా కనిపించే ఇద్దరి పాత్రలకు ఎవరినైనా సెలబ్రెటీల్ని ఎంచుకుందామని భావించాడట శంకర్. అమితాబ్ - అభిషేక్ ఆల్రెడీ కబడ్డీ - ఫుట్ బాల్ ఫ్రాంఛైజీల్ని నడుపుతున్న నేపథ్యంలో వారినే ఈ పాత్రల్లో చూపిద్దామని భావించి.. శంకర్ సంప్రదించగా ఇద్దరూ ఓకే అన్నారట. రోబో-2 సెట్లో అమితాబ్ - అభిషేక్ ఉన్న సంగతి ఆ షూటింగ్ చూసినవాళ్లు కన్ఫమ్ చేశారు కూడా. కాబట్టి రోబో-2లో అమితాబ్ - అభిషేక్ కనిపించబోతున్న విషయం ఖాయమే.