'కార్తికేయ 2' షూటింగ్ లో ప్రమాదం.. స్వల్ప గాయాలతో బయటపడ్డ హీరో

యువ కథానాయకుడు నిఖిల్ - డైరెక్టర్ చందు మొండేటి కాంబినేషన్ లో తెరకెక్కుతున్న ''కార్తికేయ 2'' సినిమా షూటింగ్ ఇటీవలే గుజరాత్ రాష్ట్రంలోని ద్వారకలో ప్రారంభమైన సంగతి తెలిసిందే. అయితే అక్కడ కొన్ని యాక్షన్ సన్నివేశాలను చిత్రీకరిస్తుండగా చిన్న ప్రమాదం జరిగినట్లు సమాచారం. ఈ ప్రమాదంలో హీరో నిఖిల్ స్వల్ప గాయాలతో సురక్షితంగా బయటపడ్డారు. ప్రమాదం పెద్దది కాకపోవడంతో యూనిట్ సభ్యులు ఊపిరి పీల్చుకున్నారు. ఇక నిఖిల్ కోలుకునే వరకు యాక్షన్ సీక్వెన్స్ చిత్రీకరణ నిలిపివేసినట్లు తెలుస్తోంది.

కాగా, చందు మొండేటి - నిఖిల్ కాంబోలో వచ్చిన సూపర్ హిట్ సినిమా 'కార్తికేయ'కి సీక్వెల్ గా ''కార్తికేయ 2'' రూపొందుతోంది. కొన్ని వేల సంవత్సరాల క్రితం నాటి రహస్యం ఆధారంగా ఒక సరికొత్త కాన్సెప్ట్ తో ఈ సినిమాని రూపొందించనున్నారు. ఈ చిత్రానికి కార్తీక్ ఘట్టమనేని సినిమాటోగ్రాఫర్ గా వ్యవహరిస్తున్నారు. ఇందులో అనుపమ పరమేశ్వరన్ హీరోయిన్ గా నటిస్తుండగా.. ప్రముఖ బాలీవుడ్ నటుడు అనుపమ్ ఖేర్ కీలక పాత్ర పోషిస్తున్నారు. పీపుల్ మీడియా ఫ్యాక్టరీ - అభిషేక్ అగర్వాల్ ఆర్ట్స్ బ్యానర్లపై టీజీ విశ్వప్రసాద్ - అభిషేక్ అగర్వాల్ - వివేక్ కూచిభోట్ల‌ ఈ చిత్రాన్ని నిర్మిస్తున్నారు.