ఆర్థిక ఇబ్బందుల్లో ఆచారి?

కష్టాలు వరస పెట్టి దండయాత్ర చేస్తున్నట్టుగా వస్తే కాస్తంత సెటైరిక్ గా సినిమా కష్టాలు అంటూ ఉంటారు. ఇలాంటి కష్టాలు జనాలకే కాదు... కోట్లు ఖర్చు పెట్టి తీసే సినిమాలకూ వస్తుంటాయి. ఒక కష్టం గట్టెక్కింది అనుకునేలోగానే ఇంకో కష్టం వచ్చిపడిపోతుంటుంది.

ఈ సినిమా కష్టాలన్నీ మంచు విష్ణు హీరోగా నటించిన ఆచారి అమెరికా యాత్ర సినిమావే. రకరకాల కారణాల వల్ల ఈ మూవీ రిలీజ్ వాయిదా వేస్తూ వచ్చారు. చివరకు అన్ని సరిగ్గా కుదిరాయని ఏప్రిల్ 27 రిలీజ్ కు ముహూర్తం పెట్టుకున్నారు. కానీ ఈ ముహూర్త బలమూ అచ్చొచ్చినట్టు లేదు. ఆచారి సినిమాను ఆర్థిక ఇబ్బందులు ఇంకా వెంటాడుతూనే ఉన్నాయని లేటెస్ట్ టాక్. సినిమా నిర్మాతలు ఎం.ఎల్.కుమార్ చౌదరి.. కీర్తి చౌదరిలతో కొందరు డిస్ట్రిబ్యూటర్లకు పాత సెటిల్ మెంట్లు పెండింగ్ లో ఉన్నాయిట. వాటి సంగతి తేల్చమని పట్టు పట్టుకు కూర్చున్నారని తెలుస్తోంది. కొన్ని ఏరియాల నుంచి నిర్మాతలకు ఇంకా అడ్వాన్లులు కూడా అందలేదనే మాట వినిపిస్తోంది.

వాస్తవానికి ఆచారి అమెరికాకు ఎప్పుడో వెళ్లొచ్చేశాడు. అదేనండీ... షూటింగ్ చాలా రోజుల క్రితమే పూర్తయింది. కానీ ఫైనాన్షియల్ ఇబ్బందులతోపాటు పెద్ద సినిమాలతో పోటీ ఎందుకని ఇంతకాలం వెనక్కి తగ్గారు. కానీ ఇంకా ఆచారి కష్టాలు కొలిక్కి వచ్చినట్టు లేదు. జి.నాగేశ్వర్ రెడ్డి డైరెక్షన్ చేసిన ఈ మూవీలో కంచె ఫేం ప్రగ్యా జైస్వాల్ హీరోయిన్ గా నటించింది.